ئاوات
از کتاب:
زڕەی زنجیری وشە دیلەکان
اثر:
جلال ملکشا (1952-2020)
1 دقیقه
897 مشاهده
لێت پرسیوم چۆنم لەم بەندیخانە
خەم دەخۆم و ئازار دەچێژم گیانە
ئازاری ئەم گۆڕیچکە نەیبەزاندووم
لە حەژمەتی فەراقی تۆیە ماندووم
بۆ هەر لایێ ئەسپی خەیاڵ دەئاژۆم
هەر ڕوو لە تۆ دەکا دڵەی خەماژۆم
پەریی چاوی تۆ دەستی لێ وەشاندووم
شێتی کردووم و تۆی لە دڵ نەخشاندووم
هەر چەندە من هەڵۆی ئەشکەستە باڵم
هێشتا بەسەر ئاقاری خۆما زاڵم
وەک قەندیل و هەڵگورد و پیرەمەگروون
سەری بەرزم دانانەوێ بۆ گەردوون
لەوەتی تۆ بووی بە یار و گراوم
بە زنجیری ئەوین شەتەک دراوم
ئەی کەنیشکە جوانەکەی خوای دڵداری
شاکاری پڕ لە نەخش و وردەکاری
زامی ناسۆری ئەم دڵە خەم ڕێژە
بە هەتوانی ماچێکی تۆ ساڕێژە