گفتار در بیان آنچه سال پنجم از نبوت حضرت سید کائنات علیه السلام واقع شد اینست
از کتاب:
روضة الصفا
اثر:
میرزا عبدالقادر پاوه‌ای (1850-1910)
3 دقیقه
424 مشاهده
جەو دما حەزرەت فەڕ بەخش شاهان
حەبیب داوەر شای ئەنبیاهان
پەردەی سەتر خۆف جە مابەین ببەرد
حوکم نبووەت وە عام ئێزهار کەرد
لەعنەت کەرد وە بوت، وە بوت پەرستان
وە گرۆی موشرێک ئەهل سەرمەستان
قورەیش دێویان چوون ئاتەش پارە
پەی موسڵمانان، نە هەر کەنارە
غەرەز، وە هەر کەس فورسەت ماوەردن
جە ئەهل ئێسلام زەجر مەکەردن
تا ئاخر حەزرەت شای «خير الأنامعربی»
مەلوول بی جە داغ کەم پەشتی ئێسلام
فەرما ئێوە کەم، کافر بێ حەساب
مەبۆ خەلاس کەن وێتان جەی عەزاب
گورێزوون جە قەوم قورەیش سەرکەش
ئێمشەو هێجرەت کەن بشن پەی حەبەش
بەعزێ موهاجر ئەو شەو تەشریف بەرد
بەعزێ جە مەککە وێشان پەنهان کەرد
ئەهل موهاجر ئەوەڵ یازدە مەرد
چەنی چەهار ژەن ئەو شەو هێجرەت کەرد
نیشتن وە کەشتی بەرشین جە ئاوان
غەرەز، تا بە موڵک حەبەشە یاوان
سورەتی «والنجم إذا هويعربی» هەم
وە لای پێغەمبەر نازڵ بی جەو دەم
حەزرەت سوجدە بەرد هەم شوکرانە کەرد
موشرێکان چەنیش یەک یەک سوجدە بەرد
پەی موهاجران ئی خەبەر بەردن
واتن موشرێکان ئیمان ئاوەردن
دیسان جە حەبەش هەم دەعوەت کەردن
تەشریف پەی مەککەی شەریف هەم بەردن
پەرساشان خەبەر جە ڕاویاران
جە حەزرەت جە قەوم گرۆی بەدکاران
واتشان بەڵێ قەوم بە ئێتێفاق
سوجدەشان بەردەن گشت بە بێ نێفاق
موحەممەد چوون یاد خوڎای ئێمە کەرد
جەو بۆنە ئێمەیچ هەم سوجدەمان بەرد
ئیسە هەم قورەیش عەداوەت داران
ئەر بگنۆ وە دەست یەکێ جە یاران
مەکەرانش زێبح پەرێ بوتخانە
پەی واتەی مەخلووق دەور زەمانە
ئاخر لاعەلاج ئامان وە خەفیف
عەودەت کەردشان وە مەککەی شەریف
هەر یەکێ وێش وست وە یانەی کەسێ
هەر یەک پەنا بەرد وە سایەی خەسێ
ئیللا عەبدوڵڵا بن مەسعوود نەبۆ
پەی موڵک حەبەش گێڵاوە جە نۆ
دیسان هەم قورەیش هجووم ئاوەردن
بینای عەداوەت هەم تازە کەردن
دووبارە حەزرەت فەرما وە یاران
وە ئەهل هێجرەت مێحنەت گوزاران
مەزانوون هەم بەد جە بەدتەر مەبۆ
موراجێعەت کەن پەی حەبەش جە نۆ
بەر نەشین جە قەوڵ فەرموودەی حەزرەت
موهاجێر دیسان کەردشان هێجرەت
بەغەیر جە سێغار هەشتاد و سێ مەرد
چەنی یازدە زەوج شای گەردەن بێ گەرد
کۆچ کەردن یەکسەر جەو زێد و ماوا
تا گشت وە ئولکەی حەبەشە یاوا