ذکر فوت عبدالمطلب و بردن ابوطالب حضرت نبوی را به نزد خو
از کتاب:
روضة الصفا
اثر:
میرزا عبدالقادر پاوه‌ای (1850-1910)
17 دقیقه
420 مشاهده
ناگا دەرد سەخت بی بە دووچارش
جە ئێش و ئازار بڕیا قەرارش
مەزاج تەبعش گێڵا بە تاڵی
ئەوقات و حاڵش بی بە بەد حاڵی
زانا وادەی کۆچ ئاخر کەردەشەن
تەشریف وە هەوار عەدەم بەردەشەن
«عبدالمطلبعربی» کێشا ئاهـ سەرد
فەرزەندان وێش یەکسەر تەڵەب کەرد
حازر بین تەمام گشت دڵ پەڕ وەسواس
نیشتن نە دەورش زکوور و ئوناس
واتش من وادەی مەرگم ها یاوا
ئەجەڵ مێهمانەن پەی جەنگ و داوا
پەی مەردەن هەرگێز دەغدەغەم نیەن
ئی ڕاگە عاڵەم گشت پێدا شیەن
مەر پەی موحەممەد غوسسەم بۆ ئارۆ
بێ کەس، نە پدەر نە مادەر دارۆ
ئێوەیچ خۆ مەعلووم لێتان عەیانەن
خاترم پەی ئەو هەر پەرێشانەن
کێتان مەتاوۆ تەعەهود کەرۆ
هەنی موحەممەد وە لای وێش بەرۆ
بەعدەز فەوت من نگاهدارش بۆ
چوون خواجە و غوڵام خدمەتکارش بۆ
چوون ئەبوولەهەب سوجدەی پدەر بەرد
پەی خدمەتکاری حەزرەت عەهدش کەرد
خەیلێ حەوڵش دا هەرتا کە تاوا
ئێلتێماس ئەو مەبزووڵ نەیاوا
زوبەیر و حارس بە ئەمر پدەر
تەعەهود کەردن پەرێ ئەو سەروەر
غەرەز، هیچ کودام نەکەردش پەسەند
حاڵی بێ جە کار دانای خێرەدمەند
تا ئەبووتالب دیا چێش بە دڵ
مەتڵووب ئەوان هیچ نەبی حاسڵ
زانا ئەو سەروەر مورادش ئەوەن
حەزرەت جە لای ئەو سەلامەت ڕەوەن
بە ئەو بەیان کەرد دەر سات ئێزهارش
بە عەرز پدەر بزورگەوارش
وات ئەر ڕەزاشەن سەردار قورێش
بەندە مولتەزێم سەد جار مەبوون پێش
شەرتەن موحەممەد خدمەتکاریش کەم
هەر تا کە زێندەم نگەهداریش کەم
هەرگێز وە ئەمرت بەر نەشوون وە بەر
یەقین مەحکوومم تا «یوم المحشر»
موحەممەد جە لام وە فەرمودەی تۆ
جە فەرزەندانم عەزیزتەر مەبۆ
فەرزەندم نۆکەر، وێم خاکسارش
ئەهل و عەیاڵم گشت پەرستارش
نازوون بنیشۆ گەردێ نە ڕەنگش
گردین بەو گەردەن مینای قەشەنگش
«عبدالمطلبعربی» سەردار کامڵ
ئێلتێماس ئەو قەبووڵ کەرد حاسڵ
دڵ وەش بی خەیلێ خەندان بی کەم کەم
تا ڕووی خەتاب کەرد وە خواجەی عاڵەم
واتش ئەی فەرزەند نوور دیدەکەم
ئێبن عەبدوڵڵا بەرگوزیدەکەم
من خۆ ها جە سۆز فێراق تاسەت
جە هێجران بۆی عەتر هەناسەت
وە غوسسەی تۆوە جەی دنیای فانی
مەشوون وە مەنزڵ جای جاوێدانی
بەعد ئەز فەوت من، وە دڵنەوازی
چەنی کام عەمووت، مۆبەت مەسازی؟
تا کە جە لای ئەو وەسییەت کەروون
ڕەزامەندی تۆ وە جا باوەروون
جەو دما حەزرەت خواجەی کائێنات
«فخر المرسلین» شای ئەعلا سێفات
تەشریفش وە لای ئەبووتالب بەرد
«عبدالمطلبعربی» ساکن بی جە دەرد
وات فەڵەک مەرهەم وە زامم شەندەن
سەکەرات مەوت تەڵخی جان کەندەن
ئاسان بی جە لام بادەی مەوت وەردەن
هیچ باکم نیەن هەنی جە مەردەن
بووسا گۆنای پاک گوڵڕەنگ حەزرەت
وە غونچەی دەهان قەشەنگ حەزرەت
بۆ نیا وە بۆی ئەو سەوڵ ساوا
ئەوەند وەسیەت کەرد هەر تا کە تاوا
رەخت زێندەگی وە جای ئەبەد بەرد
گیان تەحویل دەست قەبز قابێز کەرد
ئەو شی وە عەدەم حەزرەت وە جا مەند
بەو تەور دڵ جە شای ئەبووتالب سەند
چوون ئەبووتالب جە ڕیعایەتش
هیچ غافڵ نەبێ جە حێمایەتش
هەر تا کە قەریب زەمانەی هێجرەت
جە مەککە بەرشی تەشریف حەزرەت
هەر ئەو ڕۆ چەنی حەزرەت شەرتش کەرد
شەرت و وەفای وێش تەمام وە سەر بەرد
جەو دەم نەوشیروان جە تەخت شاهی
هەم چەنی حاتەم مەشهوور تایی
پەراکەندە بی هەر دوو بەختشان
فەڵەک تاراج دا تاج و تەختشان
چوون ئەبووتالب سەردار سەروەر
مەحز وەسییەت فەرموودەی پدەر
دایم موحەممەد نەوازش مەکەرد
هەر وە فەرق ئەو سەوگەندش مەوەرد
نمەکەرد قەبووڵ ساتێ فێراقش
دایم مەبۆسا دوو ئەبرۆی تاقش
شەوان جای خاوش هەر جە لای وێش بێ
چوون جە دوشمەنان دڵ وە ئەندێش بێ
وەقت تەناول نان هەر چەنی وێش
دایم تەعامات لەزیز مەڎا پێش
چوونکە ئەهل بەیت تەجروبە کەردن
هەر وەخت چەنی ئەو تەعام مەوەردن
مەبی وە سەد ڕەنگ توعمەی گووناگوون
وێشان سێر مەوین تەعام هەم ئەفزوون
ئەگەر وە بێ ئەو تەعام مەوەردن
جە گروسنەگی زەعف مەکەردن
تەعام فراوان ماوەردن تاهر
تا دەس مەوەردن مەیاوا ئاخر
چوون ئەبووتالب مەشناسا زاتش
دایم ئاگا بێ جە موعجێزاتش
وەر جە نبووەت و بەعد جە بێعسەت
ئێلتێمامش کەرد جە ئەمر حەزرەت
خوەلاسە ئەو سەوڵ جەننەتولماوا
تا سنعش وە ساڵ دوازدە یاوا
جە قەوڵ ئەخبار شیرین ئێنتێخاب
مەزموون مەکتووب «روضة الأحبابعربی»
ساڵ سێزدەهەم جە بەتحا مەقام
عومر هومایوون شای «خير الأنامعربی»
چوون ئەبووتالب سەردار سەروەر
جەو دما کەردش ئێرادەی سەفەر
بشۆ تا بە شام پەرێ تێجارەت
خەرمان عوسرەت بدۆ وە غارەت
حەزرەت بە مەحزوون فەرماوا ئەی عەم
من مازی وە جا جە مەککە بێ غەم؟
نە مادەر نە کەس نە پدەر داروون
وە بێ تۆ ئەوقات وە تاڵ مەویاروون
ئەبووتالب دیش، دێققەت کەرد حاسڵ
دەریاچەی ڕەحمش جۆشیا نە دڵ
وات وەڵڵا حەرفت گشت نەقش دڵەن
فێراقت جە لام خەیلێ موشکڵەن
ئەر جەردەی ئەجەڵ ئەلئان یاوان پێم
مەبۆ ببەرووت یەقین چەنی وێم
پەرێشان مەبەر خاتر بکەر شاد
نمازووت وە جا هەر چ بادا باد
خوەلاسەی کەلام تەدارەک کەردش
خواجەی کائێنات چەنی وێش بەردش
قافڵەی قورەیش دەردەم بی ڕاهی
هەم ئەبووتالب ئومێد گاهی
حەزرەت سوار کەرد چەنی توجاران
وە عەزم مایەی خەرید شاران
قافڵە سەنگین ئاڵای خۆش تەرغیب
یاوا دوو فەرسەخ بە مێسر قەرەیب
نەو جا یەک شەخسێ عالی مەقام بێ
ڕاهێبێ عەجیب بوحەیراش نام بێ
یەک سەومعەی خاس بەرز دیاری
قەرار دا بێ پەی تاعەت گوزاری
بە عێلم تەورات، زەبوور و ئێنجیل
هەم بە چەند مەکتووب بورهان و دەلیل
سیفات حەزرەت یەک یەک مەزانا
دایم پەی مەردوم بەحسش مەوانا
مەزاناش ئەو شای شێوە شیرینە
قەدەم ماوەرۆ بەو سەر زەمینە
هەر جا ڕاهێبێ تەمام ئەعزەم بێ
جە لای بوحەیرا جەرگەشان جەم بێ
ئەو ڕۆ بوحەیرا وێش شی وە باڵا
قەدەم بەرد وە بان سەومعەی ئاڵا
خەیلێ نگا کەرد بەو دەشت و دەردا
وە ڕاویاران وە گشت گوزەردا
دیش یەک قافڵەی سەنگین دیارەن
گشت ساحێب بوڕاق ئوشتر سوارەن
گشت عەرەب سوار ئەرباب دەوڵەت
گشت مەرد مەعقوول ئەهل مەشوەرەت
گەرمای تابستان، بریەی توونا توون
جۆش ئافتاب شەرارەی سەبوون
حەرارەی تابش بڎا وە هەر کەس
دەرلاد مەکەردش وە سفتەی قەقنەس
یەک لەکە هەورێ وە سەد جەهد و جەخت
مەگێڵا چەنی قافڵەی خوشبەخت
هەر بەو ئەندازە بە ڕووی هەواوە
چەنی کاروان مەشی وە ڕاوە
تا کە قافڵە وە نەزدیک یاوا
سەڎای دار و سەنگ ئەو زێد و ماوا
هەر کامێ پەی وێش وە «لبيك لبيكعربی»
مەوات یا ڕەسوول «سلام عليكعربی»
بوحەیرا جەی سێڕ خەیلێ حەیران مەند
حەرفش نە دەهان یەکسەر شی نە بەند
شەخسێ جەو دەمدا ئاوەرد ئەو نەزەر
مەوسووف بە ئەوساف خاتەم پێغەمبەر
شەجەر و حەجەر خاک و ئاو و باد
سوجدەش مەبەردن گشت وە خاتر شاد
وەحشیان مامان گشت وە ئەقدامش
هەر کامێ پەی وێش مەکەرد سڵامش
بوحەیرا فەوری زانا کە وێشەن
نیشانەی «ختم المرسلينعربی» پێشەن
قافڵەی قورەیش بە چەند غەرایێب
تا یاوان وە پای سەومعەی ڕاهێب
جەو کەفر و مەنزڵ پەی سەرئەفرازی
یەکسەر مەشغووڵ بین وە بارئەندازی
حەزرەت چەنی عەم جەو دەم وە جەختێ
فەڕ قودووم بەرد وە پای درەختێ
درەخت کام درەخت؟ خوشک هەزار ساڵ
سەبز و خوڕەم بی شانا پەڕ و باڵ
بوحەیرای ڕاهێب خێزا بێ ئەندێش
«ما حضر»ێ خاس تەرتیب دا بە وێش
شی نە تۆی خەڵوەت سەومعەی پەڕ عەیش
تەڵەب کەرد تەمام قافڵەی قورەیش
واتش حازر بان ئەهل کاروان
خواجە و غوڵام گشت جە پیر تا جوان
تەشریف ئەو شای مەلایک قەدەم
هەر نەو جا بەند بێ بە ئێشارەی عەم
قەبیلەی قورەیش حازر تا غایێب
یەکسەر شین وە تۆی سەومعەی ڕاهێب
بوحەیرا یەک یەک نەزەر کەرد لێشان
دیش نیەن مەتلووب ئەو جە دلێشان
راهێب جە مەجلێس فەوری ئاخێز کەرد
تەشریف هەم وە بان سەومعەی وێش بەرد
دیا دیش ئەو شەخس هەر ها نە جای وێش
ها جە خەیاڵ دا، سەر وستەن وە پێش
سەحاب جە باڵا هێمای هەر بەندەن
سایەش چوون سەیوان پەرێش ئەفکەندەن
راهێب حاڵی بی هەم ئاما بە وار
ڕوو کەرد نە یاران ئاما وە گوفتار
واتش من واتم ئێوە یەکسەر گشت
خواجە تا غوڵام، زیبا تا وە زشت
چەنی سارەبان تا مەرد کێبار
یەکسەر حازر بۆ پەی ئەکل نەهار
ئیسە چوون ئێوە تەخەللوف کەردن؟
چەند کەس دیارەن تەشریف ناوەردن
واتشان بە غەیر یەک خوردە ساڵێ
نەمەندەن وە جا غەیر جە مناڵێ
راهێب حاڵی بی شای لەولاک وێشەن
حوکم ئەوەڵ و ئاخرش پێشەن
راهێب سەوگەند وەرد وە لات و مەنات
مەبۆ هەم ئەویچ بەیۆ وە بەسات
حارس چوون شنەفت تەعەهود کەردش
حەزرەت چەنی ئەو هەم تەشریف بەردش
سەرچەشمەی دەریای دین و مەزاهێب
داخڵ بی وە جەمع سەومعەی ڕاهێب
بەر ئاما جە کەل چوون بەدر کامڵ
شوعلەی جەماڵش ڕەنگین کەرد مەنزڵ
جە فەڕ قودووم پاک پەیغەمبەر
ڕاهێب سەرئەفراز، مەنزڵ مونەوەر
ئەتراف قەریەی کەفر جەو پەرتەو
جە زیبای تەلعەت هومایوون ئەو
گشت بی بە ڕەوزەی بەهەشت باقی
بوحەیرا زاناش یەقین بە تاقی
موحەممەد خاتەم ئەنبیاهانەن
شەرەف بەخش تاج تەخت شاهانەن
خاس کەرد تەماشای دین دیدارش
حەیران مەند جە نوور بەدر ڕوخسارش
ئەوساف مەکتووب نیشانەی خاتەم
موشاهێدەش کەرد یەکسەر دی وە چەم
جەو دما فەرما نەهار ئاوەردن
قافڵەی قورەیش گشت ئەکل کەردن
بە ئێشارەی ئەو شەخس پاک نەزەر
مەند ئەبووتالب چەنی ئەو سەروەر
راهێب چوون مەیلش تەمام بی غالب
ڕووی خەتابش کەرد نە ئەبووتالب
واتش ئی جوان ڕیشەی دڵ کێشەن
داخۆ چەنی تۆ نێسبەتش چێشەن
ئەبووتالب وات بە من فەرزەندەن
ڕۆحم جە بەدەن هەر بە ئەو بەندەن
راهێب وات عوقدەی موشکڵ کەر ئاسان
من جە تۆ خاستەر ئەوم شناسان
چوون دایە و بابۆش ئەر بەو سێفات بان
مەبۆ هەر دوو فەوت زومرەی ئەموات بان
ئەبووتالب وات خوڎاوەند دادەن
موحەممەد بە من برادەر زادەن
راهێب وات سەدەق، فەرموودەت ڕاسەن
قەوڵ دووبارەت بێ کەم و کاسەن
ڕوو کەرد وە خدمەت شای «خير البشرعربی»
پەرێ ئێمتێحان ئەیقان و خەبەر
وات ئەی موحەممەد شای سەعادەتمەند
بە لات و عوززا مەدەرووت سەوگەند
هەر چی من جە تۆ مەکەروون خەتاب
جە ڕووی سەداقەت پێم بدەر جواب
حەزرەت فەرماوا کە ئەی بێ خەبەر
بە لات و مەنات من سەوگەند مەدەر
هەرگێز نەداروون جەوان دوشمەن تەر
سەوگەند هەر وە زات دەهندەی داوەر
راهێب حاڵی بی شای لەولاک وێشەن
حوکم ئەوەڵین ئاخرین پێشەن
ئەمجار «من الله سئلتكعربی»ش وات
پەرسا جە ئەحواڵ خواجەی کائێنات
غەرەز، جە حەزرەت چەند سوئالات کەرد
جە ڕۆح، جە قاڵب، جە دەوا و جە دەرد
جوابش داوە وە دەوان دەو
یەک یەک موتابێق مەعلوومات ئەو
دیا پەی دیدەی سیای مەخموورش
مەست قەترانی بێ سورمەی توورش
جە ئەبووتالب پەرسا دیدەی ئەو
وات کەحلش زایێل مەبۆ دمای خەو؟
وات نەخەیر دیدەش دایم خودڕەنگەن
بێ مەی مەس و بێ، سورمە سێوەنگەن
خەیاڵ کەرد پەرێ ئێتمینان دەردەم
موهر نبووەت بوینۆ وە چەم
راهێب چەند لاڵا و سوجدەی ئەدەب بەرد
حەزرەت جە میان ئێمتێناع مەکەرد
تا ئەبووتالب کەردش ئێلتێماس
دۆش موبارەک وەزع کەرد جە لێباس
موهر نبووەت، بەخ بەخ هەیسوور
جە بەین کەتفەین شای ئەعلا حزوور
راهێب شەرەفیاب وە خەتم خاتەم
هەم بووساش وە دەم هەم ماڵاش وە چەم
واتش مەعلووم بی قیبلەی یەقینەن
وەڵڵا «رحمة للعالمينعربی»ەن
بزورگەن بێ عەیب «عظيم الشانعربی»ەن
یەقین پێغەمبەر ئاخر زەمانەن
خەتم ئەنبیا و نەبی و ڕەسووڵەن
دوعاش گشت جە لای خوڎا قەبووڵەن
رۆی مەحشەر شافێع گوناهبارانەن
سەردار زومرەی گشت سەردارانەن
وە خاشاک پاش عاڵەم موحتاجەن
ئێحزار مەنزڵ تەخت مێعراجەن
مەخلۆق گشت پەرێش موسەخخەر مەبۆ
عاڵەم ئوممەت ئەو پێغەمبەر مەبۆ
نەهانی واتش بە ئەبووتالب
یەهوودان شام، غاڵبەن غاڵب
چەنی موحەممەد عەداوەت داران
دایم وە ئەنگوشت ساعەت مەشماران
نادم بەر جە شام مەشۆ ئی سەفەر
ئەر مەشی حەزرەت چەنی وێت مەبەر
چەند عەدووی گومڕای ناخار هانە ڕێش
نەوا ئاسیبێ دووربا یاوۆ پێش
قەبیلەی قورەیش یەکسەر جە غایێب
واتن موحەممەد جە لای ئی ڕاهێب
خەیلێ موحتەرەم قەدرش زیادەن
نیشانەی دەوڵەت خوڎا پێ دادەن
جەو دەمدا یەهوود جە ڕووم چەند نەفەر
وە عێلم تەورات زانا بین خەبەر
موحەممەد جەو دەم جە سن سوغرا
ڕاش مەگنۆ وە کەفر وە لای بوحەیرا
یەهوودان شمشێر قەست بەتڵ ئەو
بەستن نە کەمەر پەرێ قەتڵ ئەو
یەڵغار دان وە جەخت چوون بەرق شاهێب
تا کەفر مەشهوور سەومعەی ڕاهێب
گشت دیشان وە چەم حزوور حەزرەت
خوەرشید ڕوخسار پەڕ نوور حەزرەت
گشت وە بوحەیرا مەتڵەب عەرز کەردن
دەلیل و بورهان تەورات ئاوەردن
واتن ئی شەخسە دارای موعجێزات
چەند وەسفش کەردەن ئەلها جە تەورات
نەسخ مەکەرۆ دین، موسا بن عێمران
ما باقی ئەدیان گشت پێغەمبەران
مەبۆ قەتڵش کەین وە سەر مەودای تێخ
ئەسڵ و بونیادش باوەرین جە بێخ
تۆ هەم کومەک بەر، یار هەر باقیەن
جە عیسا و موسا تەفاوت نیەن
تەرسا و یەهوودی هەر چەند فنوونەن
تەورات و ئێنجێل هەر یەک مەزموونەن
راهێب دا جواب تایفەی یەهوود
وات ئەر ئی شەخسە «واجب الوجودعربی»
وەسفش جە مەکتووب سەماوی کەردەن
پەردەی حێجابش وە ڕوو ئاوەردەن
یەد قودرەتش پەی ئەو ئەسپەڕەن
جە دام دوشمەن پەرێش ڕەهبەرەن
پەی قەتڵش یارای دەست کەس نیەن
مایەی عەقڵتان یە ئەو کۆ شیەن؟
هەم ئەر ئی شەخسە ئەگەر ئەو نەبۆ
ئاگاش جە ئێعجاز ڕوئیا و خەو نەبۆ
جوویای مەعیشەت زێندەگی وێشەن
قەتڵش پەی ئێوە فایدەش چێشەن؟
یەهوودان خەیاڵ کەردن فەرامۆش
پەند بوحەیرا گێرتشان نە گۆش
چوون ئەبووتالب خۆفش کەرد حاسڵ
ئێرادەی شامش نە دڵ کەرد باتڵ
مایەش جە مێسر یەکسەر فرۆش کەرد
هەم چەند بارخانەی مەتاعش ئاوەرد
نە سەد جا چەنی دوشمەن کاونا
تا حەزرەت وە شار مەککە یاونا
جەو دما هەنی هەرچی سەفەر کەرد
حەزرەت چەنی وێش هەرگێز نمەبەرد
عومر شەریفش یاوا هەفدە ساڵ
پەرێ تێجارەت یەمەن کەرد خەیاڵ
زوبەیر و عەبباس هەر دوو مونتەخێب
فەرزەندان سولب «عبدالمطلبعربی»
ئەوان هەم کەردن ئێرادەی سەفەر
بە شەرتێ حەزرەت پاک پێغەمبەر
تەشریف خەیرش بشۆ چەنێشان
بەڵکە فایز بان جە مایەی وێشان
جە ئەبووتالب ئێلتێماس کەردن
تەشریف حەزرەت نەبەوی بەردن
جەناب سەیێد ئەولاد ئادەم
شەفیع مەخلووق سالار خاتەم
سوار بی وە زین جان بازەی باد پا
چەنی هەر دوو عەم ڕاهی بین نە ڕا
خاک و هەرد و بەرد سڵام مەکەرد لێش
حەزرەت حەیران بێ جە حاڵات وێش
غەرەز، جەو ڕا دا چەند خەوارێقات
چەند سێڕ عەجیب هەم چەند موعجێزات
یەک یەک دین وە چەم جە شای ئەنبیا
جەو سەردار پاک سپای ئەسفیا
هەر جەو ساڵ هورمز ئێبن نەوشیروان
مەعزوول بی نە تەخت حەیات وە دەوان
هەر جە ئەقارێب تایفەی وێشان
نە هەر دوو دیدەش مێڵ گەرم کێشان
ساڵ نوزدەهوم عومر پێغەمبەر
خەسرەو پەرویز نیشت نە جای پدەر
جە ساڵ بیستوم سددیق ئەکبەر
جە مولازێمەت شای «خير البشرعربی»
شین وە تێجارەت دیسان پەرێ شام
هەم چەند جە یاران سەحابەی کێرام
جە یەک مەنزڵی نزوول کەردشان
ڕەسم کاروان، زادێ وەردشان
تەشریف حەزرەت شای «ارفع القدرعربی»
قەدەم ڕەنجە کەرد پەی درەخت سەدر
نیشت وە ڕاحەت چوون، مەلایکەی عەرش
سەف بەستن جە فەوق فریشتان فەرش
راهێبێ کەبیر ئاما پەی تەسدیق
پەی ئازمایی پەرسا جە سددیق
وات ئەو شەخسە کێن نە پای ئەو درەخت
چوون پادشاهان ساحێب تاج و تەخت
واتش موحەممەد وە عاڵەم موحێب
ئێبن عەبدوڵڵا «عبدالمطلبعربی»
راهێب وات وەڵڵا ئەو پێغەمبەرەن
شانش شەفاعەت «يوم المحشرعربی»ەن
سەردار ئەعزەم گشت سەردارانەن
مەعلووم بۆ خاتەم پێغەمبەرانەن
وەی تەور جە ئێنجیل من دیەن وە چەم
عیسای بن مەریەم، ڕەسوول خاتەم
بەغەیر ئەو دوو شەخس باقی هیچ ڕەسوول
وە پای ئەو دارە نەکەردەن نزوول
سددیق هەر ئەو ڕۆ پەی بە مەتڵەب بەرد
بە نبووەتش بە دڵ باوەڕ کەرد
بی بە بیست و یەک سنع ئەو سەروەر
عومر هومایوون شای «خير البشرعربی»
مەلایک کەم کەم وێشان کەرد ئێزهار
گاهێ جە خاودا، گا گا جە بێدار
تا یەک ڕۆ حەزرەت فەرماوا ئەی عەم
من عەجایبات مەوینوون وە چەم
چەند شەو سێ نەفەر سەر تا پا تاهێر
ڕوو بە ڕوو سەریح وە من بین زاهێر
بە دێققەت وە من نەزەر کەردشان
وە ڕووی پێشانیم ئەنگوشت دەردشان
واتشان وێشەن بەڵام چوون ساوان
وادەی زهوورش هێمای نەیاوان
من جەی سێ شەخسە خۆفم حاسڵەن
هەر شەو تا وە ڕۆ وەسواسە دڵەن
ئەبووتالب وات خۆف بەر کەر نە دڵ
ئانە خەیاڵەن زوو مەبۆ باتڵ
خەتەر و خەیاڵ پەی گشت کەس بیەن
ئی نەوعە ئوموور هیچ موشکڵ نیەن
تا سێ شەو ویەرد دیسان هەم جە نۆ
حەزرەت وات ئەی عەم مەعلووم بۆ جە تۆ
جوملەی ئەو سێ شەخس ئێمشەو یەک نەفەر
زاهێر بی وە من چوون شوعلەی قەمەر
جە ناگا دەست بەرد وە تۆی دەروونم
نەکەرد جەراحەت، نەڕێزا هوونم
بەڵکە جەو زەحمەت ڕاحەت یاوا پێم
حەقیقەت خەیلێ حەیرانم جە وێم
هەم ئەبووتالب دڵ کەرد پەڕ ئەندێش
دوور با ئاسیبێ نەک یاوا بۆ پێش
بەردش پەرێ دەفع خەتەر و خەیاڵ
وە لای تەبیبێ دانای ساحێب حاڵ
غەرەز پەی تەبیب پیر کوهەن ساڵ
بەیان کەرد تەمام چگوونەگی حاڵ
هەنی دەرد دڵ یەک یەک واتم پێت
موداواش وە تۆ وێت و خوڎای وێت
تەبیب دیا پەی جێسم لەتیفش
کەرد مولاتفەی نەبز شەریفش
ئەعزای موبارەک حەزرەت دی وە چەم
موهر نبووەت نیشانەی خاتەم
وات ئەبووتالب ئی فەرزەند تۆ
بەخت ئەرجومەند هومایوون تۆ
بوڵەندەن بەڵام نەیاوان حاڵا
پارچەی ئەقدەسش بڕیان وە باڵا
جە عەیب و عێللەت موبەڕا و پاکەن
خواجەی فریشتان هەر هەفت ئەفلاکەن
جە ئاسیب جن، شەیاتین دوورەن
جن کەی قودرەتش وە شوعلەی نوورەن
ئەو ئەشخاسانە ئەو دیەن جە شەو
گشت مەلایکەن مەیان وە لای ئەو
پەی ئاگاداری وەخت زەروورەت
تەفتیش مەکەران پەرێ نبووەت
ئەگەر یەهوودان بزانان خەبەر
شمشێر پەی قەتڵش مەنیان نە کەمەر
تا ئەبووتالب دارای زەمانە
حەزرەت بەرد و شین پەی دەوڵەتخانە
بەعدەز ئەندەکێ جە مابەین ویەرد
سێ بارە حەزرەت عەرز عەمووش کەرد
فەرما ئێمشەو من هەم نە ئازار بیم
بێ غوسسە و خەیاڵ وەی تەور نە خاو دیم
یەک دارێ جە سەقف خانە بەرداشتم
وە نەردەبانێ نوقرە گوزاشتم
دیم دوو کەس جە سەر لێم بین ئاشکار
جەو پەیجەی نوقرە تا ئامام بە وار
یەکێ دوور مدرا یەکێشان جە لام
وێنەی خەریدار کەردش تەماشام
ناگا وێنەی بەرق دەست وە بەتنم بەرد
دڵم جە دەروون وە بیروون ئاوەرد
وات دڵێ پاکەن دڵی پێغەمبەر
جای ڕەحمەن پەی ڕۆی زلزلەی مەحشەر
ئێڎ وات و هەم دڵ نیا وە جای وێش
بێدار بیم نمەز تا چێش ئاما پێش