گفتار در بیان وقایعی که در سال چهارم از ولادت حضرت نبوی روی داده تا سال سیزدهم این است
از کتاب:
روضة الصفا
اثر:
میرزا عبدالقادر پاوه‌ای (1850-1910)
2 دقیقه
613 مشاهده
بەڵێ جە مەکتووب عولەمای سیەر
بە قەوڵ سەریح وەی تەور دان خەبەر
چوون شەق سەدر خیلافش نیەن
نەک جارێ چەند جار هەم واقێع بیەن
دیسان حەلیمەی حێلم خەیرئەندێش
هەم حەزرەتش بەرد وە قەبیلەی وێش
بە دیدە و بە گیان خدمەتش مەکەرد
دایم هەر سوجدەی بەندەگیش مەوەرد
شەوهەر کەردەبێ وە قاپی وانش
هەر دوو فەرزەندان بە پاسەوانش
گا گا ماوەردش وە مەککەی ئەعزەم
مەکەردش تەواف کۆی سەفا و زەمزەم
جەناب حەزرەت بەری جە گشت عەیب
جار جار جە نەزەر حەلیم مەبی غەیب
حەلیمە جەی باب دایم خایێف بێ
خەمین و خەمناک زەرد و زایێف بێ
غەرەز، تا حەزرەت بی بە پەنج ساڵە
ئێعجازش مەبەرد کافران زاڵە
دیسان هەم بەردش وە مەککەی شەریف
وە قەسر بەیزا مەرتەبەی زەریف
کاهینێ جە دوور حەزرەت دی وە چەم
ناڵا و پێچش وەرد چوون مار ئەرقەم
واتش ئەی عەشرەت قەوم قورەیشی
شادی و وەشیمان گشت جە دەس بەرشی
ئینە پەیغەمبەر ئاخر زەمانەن
خراب کونەندەی بوت و بوتخانەن
کەس جە دەست ئەو نمەشۆ وە بەر
ئارۆ قەتڵش کەن وە مەودای خەتەر
«عبدالمطلب» قەدەغەن کەردش
پەنهان جە نەزەر ئەهالی دەردش
قەبیلەی قورەیش قەوم کینەکێش
جە خۆف حەزرەت مەکەردن ئەندێش
رۆ جە ڕۆ فێشتەر حەسەد مەوەردن
جە شای ئەنبیا حەزەر مەکەردن