giftar dir byan wiqay’î kih dir sal çiharim az wiladit ḧizirit nibwî rwî dadih ta sal sîzdihim ayn ast
Li pirtûka:
Rewzetul Sefa
Berhema:
Mîrza Ebdilqadirê Paweyî (1850-1910)
2 Xulek
378 Dîtin
bełê ce mektûb ’ulemay syer
be qewł serîḧ wey tewr dan xeber
çûn şeq sedir xîlafiş nyen
nek carê çend car hem waqê’ byen
dîsan ḧelîmey ḧêlim xeyr’endêş
hem ḧezretiş berd we qebîley wêş
be dîde û be gyan xidmetiş mekerd
daym her sucdey bendegîş mewerd
şewher kerdebê we qapî wanş
her dû ferzendan be pasewanş
ga ga mawerdiş we mekkey e’zem
mekerdiş tewaf koy sefa û zemzem
cenab ḧezret berî ce gişt ’eyb
car car ce nezer ḧelîm mebî ẍeyb
ḧelîme cey bab daym xayêf bê
xemîn û xemnak zerd û zayêf bê
ẍerez, ta ḧezret bî be penc sałe
ê’caziş meberd kafran załe
dîsan hem berdiş we mekkey şerîf
we qesir beyza mertebey zerîf
kahînê ce dûr ḧezret dî we çem
nała û pêçiş werd çûn mar erqem
watiş ey ’eşret qewm qureyşî
şadî û weşîman gişt ce des berşî
îne peyẍember axir zemanen
xirab kunendey but û butxanen
kes ce dest ew nimeşo we ber
aro qetiłş ken we mewday xeter
«’ibdalimtilb» qedeẍen kerdiş
penhan ce nezer ehalî derdiş
qebîley qureyş qewm kînekêş
ce xof ḧezret mekerdin endêş
ro ce řo fêşter ḧesed mewerdin
ce şay enbya ḧezer mekerdin