zikir şiq sidir an sirur ’alî miqdar bih amir xalq pirurdigar û agah yaftin ḧilîmh û mirdimha
Li pirtûka:
Rewzetul Sefa
Berhema:
Mîrza Ebdilqadirê Paweyî (1850-1910)
10 Xulek
570 Dîtin
cew dima ḧezret şay bułend êqbał
’umir şerîfiş yawa be sê sał
dû nefer êxwan řeza’î hem daşt
meşîn we seḧra her sub ta we çaşt
be ’ezim nyaz ḧeywan çeranî
mekerd pey wêşan daym çûpanî
ḧezret bew xêlqet kes nedarewe
bew lefiz şîrîn şeker barewe
persa ce daye kon biraderan
dyarşan nyen ye we ko meşan?
ḧelîme watiş řoḧim fidat bo
biraderanit han ce seḧra û ko
meşẍûłen we kar ḧeywan çeranî
be şew han ce mał be řo şebanî
ferma to pey çêş minîç nekyanay
min çenî ewan tefawit zanay?
ḧelîme watiş we ban dîdem
seba toyç bişo hey berguzîdem
çûn «’ilî alisbaḧErebî» serş şane kerd
pirç muşkînş dane dane kerd
dîdey şabaziş řeşt be surmey tûr
xêza ce tel’et zîbaş, ko koy nûr
lêbas e’laş poşa we qamet
perê ew qamet xêza qyamet
pey defi’ nezer ’eyn bedkaran
yek gerden bendê řoy řozgaran
gişt le’il yemen fîrûzey kanî
cizi’ tilêsmat çûn neqiş manî
wistiş we gerden mînay muḧemmed
pexiş bî we qamet ře’nay muḧemmed
ce naga dest berd şay tac lewlak
ce wêş kerdewe hewaş da ne xak
wat ew kes nigadarindey minen
řeḧmet bê payan darindey minen
nigam medaro we eltaf wêş
ce qułwaney qoł gerdinbendim çêş
teşrîf berd û şî we bê mudara
çenî êxwanan řû kerd we sara
ḧelîme wesyet kerd be ferzendan
xeylê lałe kerd bew ercumendan
watiş dexîlim ce seḧra û ce ko
aro agatan ce muḧemmed bo
xwelasey kelam her sê çenî hem
şîn we çiragay ḧeywan we bê xem
naga dû nefer berg sifîd poş
yekêşan ḧezret gêrit we ban doş
berdişan we ban yek koyê bułend
sîneşan şikafit we bê çûn û çend
yekê ce êxwan řû nya pey mał
perê ḧelîme awerdiş eḧwał
be çend êztêrab feryadiş mekerd
dya û ḧelîm dî zerde xendeş kerd
muşkiłen be gyan to byawî pêş
sîneş çak byen we ser mewday nêş
ḧelîme çenî şewherş derlad
řû kerdin we deşt we dad û bêdad
te’cîl kerdişan ta yawan be ko
dîn ḧezret nîşten wêney mah no
nigaş be etraf asman mekerd
dya we ḧelîm zerde xendeş kerd
ḧelîme bosa řuxsar pakiş
ferq munewwer tac lewlakiş
watiş fidat bam erwaḧekey wêm
waqê’at wêt beyan ker perêm
ḧezret da cwab wat çenî eẍnam
ce lay êxwanan nîştebêm we kam
naga dû nefer peyđa bîn ce ser
min ce lay êxwan berkerdin we ber
çûn nesîm subiḧ bad ’enber bo
ta min yawnan we ban î ko
fewrî we bê têẍ sînem şikawan
bełam zeḧmetê be min neyawan
des berdin diłim ce goşey derûn
yek nuqte syay cyay peř ce hûn
awerdin we ber hewa dan ne xak
derûnim ce ẍeş ẍeyre kerdin pak
watşan ane ḧez le’înen
etba’ kufir û ênkar dînen
yekêşan êbrîq sifîd çûn sedef
ew hem yek teştê zumuřřud ne kef
derûnim we berf şustişan temam
ne êş bî ne derd ne zux bî ne zam
wêşan wêney teyr şeqqe dan we bał
şîn pey asman we bê qîl û qał
ḧelîme çenî şewherş ce no
horgêrtin ḧezret ce ban ew ko
berdişanewe dîsan pey yane
şay’ bî ce lay xwêş û bêgane
cem’ê ce merdum xeylê firawan
watşan asîb cinnî pêş yawan
selaḧ her êđen be sêdiq û yeqîn
biberîş we lay yekê ce kahîn
ḧezret fermawa be ehil merdim
«siḧîḧ alimzac», bê beła û derdim
xeyał merdim ce asîb cin
hîç mezeřetê neyawan be min
xwelasey kelam qewm qebûł nekerd
ḧelîm muḧemmed we lay kahên berd
watiş î ferzend diłřubay diłkêş
’ecîbê wey tewr waqê’ byen lêş
cey řemze xeylê dił be endêşen
biđye ne kêtab bizane çêşen
kahên watiş to xamoş ker zeban
ta ew şerḧ wêş bikero beyan
muḧemmed temam waqê’at wêş
beyan kerd perê gumřay kîne kêş
kahên çûn cergiş biđo we nêşda
muḧemmed kêşa we sîney wêşda
feryad kerd ce no watiş ey me’şer
’ereb ’eşayr qewm bê xeber
beyan muḧemmed pare ken we têẍ
kes ce qetił ew nekero dirêẍ
minîç çenî ew biřêzan hûnim
serwazen ce ẍem dîg derûnim
eger byawo êđ be ḧed wêş
ne usûl mazo ne ayîn ne kêş
ne but memano ne hem butxane
mebo be serdar ehil zemane
mawero dînê taze be řûy kar
baqî edyan gişt, mebo nigûnsar
ce betḧa û yesrêb megîro menził
dîn mêllet gişt mekero batił
ḧelîme xêza derdem watiş fût
ey pîr mexşûş xerefyay fertût
lêwey bed kelam bed xûy bed çare
tenxiway muḧemmed to keran pare
dest berd ’emameş ce ser şendewe
ḧezretiş ce dest kahên sendewe
we sed xeyałat ẍayle û endêş
ḧezret yawna hem we yaney wêş
cew dima xwêşan giroy qewm û ferd
xeylê serzenş ḧelîmeşan kerd
watin muḧemmed řimûzê pêşen
ce xofiş daym dił we endêşen
henûz asîbê ta řû neđan lêş
byawinş we lay qewm û kar wêş
axêz kerd derlad ḧelîmey ’ereb
ḧezret swar kerd we pişt merkeb
hatfê ama ce çerx çep gerd
ce benî se’d, bereket koç kerd
nekerd mudara bew diłey peř xem
take derwazey mekkey mu’ezzem
pey qezay ḧacet pa awerdewe
muḧemmed derlad pyađe kerdewe
cew dem ḧezretiş kerde bî ẍafił
dîş leke ebrê sifîd bî naził
nigaş kerd ḧezret dyarş nyen
şu’ley nûr bedir řuxsarş nyen
dest kerd be feryad we şîn û zarî
esrîn çûn çeşmey çeman kerd carî
mepersa ce xełq međa we serda
megêła bê yar bew deşt û derda
rahîbê persa ey ’ewret çêşen?
to pey kê wey tewr xatirit řêşen?
wat pey muḧemmed qureyşî neseb
êbin ’ebdułła mustefa leqeb
cey kûçe satê ẍafiłim kerden
ẍafławem bo nimez kê berden
her çend megêłûn dyarş nyen
wey we yanem wey, ce des berşyen
řahêb wat bişo we butxane zûd
pena ber we but bizurg me’bûd
yeqîn ew perêt mebo řehnimon
teḧqîq mezano ferzendit ce kon
ḧelîm wat ey pîr dêwaney eḧmeq
xerefyay xer tebi’, bed çêhrey erzeq
mer to nezanay ce řûy serzemîn
ce şew mewlûd muḧemmed emîn
ehil kufir û şirk gişt byen xicił
ḧukim butxanan gişt byen batił?
wicûd pakiş cey zemaneda
lawêz awerden we butxaneda
ew çoy řeq û wişk çêş kerden pey wêş
take min bişûn pena berûn pêş
penam her we lay xuđay êbrahîm
bikero kerem muşkił guşayîm
řahêb wat ’ewret hezyan mewaçe
cey fêşter meber hem desepaçe
take min bişûn we toy butxane
tenxiway to ’erz kem be meḧremane
perê ferzendit kerûn şefa’et
beł peydaş kero hubel cey sa’et
ew pîr cahêł xêza pelapel
ta şî sucde berd sê car we hubel
’erz kerd î ’ewret se’dyey diłteng
meřêzo hûnaw eser lale řeng
yek muḧemmed nam ’alem pey řaẍb
êbin ’ebdułła «’ibdalimtilb»
aro gum kerden ce kûçey şarda
megêłan mexlûq ehil bazarda
nyen, napeydan, nimez kê berden
îse ha penaş we to awerden
me’lûmen ce to muḧemmed ce kon
henî wêt zanî êxtyar be ton
şeytan şî ne qelb cewf ew senem
pey gifit û şinûd ehil beynet kem
hubel çûn şineft zwîr bî ce qar
naga wêney seg ama we guftar
wat ce muḧemmed min karim çêşen
daym derûnim xo ce ew řêşen
ew kesê daro hîç nedaro bak
ême gişt we des ew mebîn helak
dinyaş be kamen felek yarşen
xuđay lamekan nigađarşen
to sifarş ker we but perestan
we badexwaran ehil sermestan
řezay min êđen qewłim neken řed
bikoşan perê qetił muḧemmed
pîr ce butxane ser awerd we ber
wat we ḧelîme to hîç xof meker
ferzendit xeylê şe’inş ’ezîmen
ḧebîb ḧezret danay qedîmen
bişo biperse ce no eḧwałş
şad mebî we dîn cebhey cemałş
ḧelîme ce pîr ye’siş ḧasił kerd
hana we «’ibdalimtilb»ş berd
watiş muḧemmed ce fiłan guzer
gum byen îse nedarûn xeber
«’ibdalimtilb» dêwya derdiş
serzemîn tem best ce ah serdiş
nała we zigar pêçya ce derd
derlad teşrîfiş we koy sefa berd
qebîley qureyş cem kerd û sef da
yek yek řahî kerd we her teref da
mekkey şerîf û etrafiş temam
gêłan her ce sub take nimay şam
hîç kes neyawa ce ew nîşanê
dyarş nebî ce hîç mekanê
«’ibdalimtilb» wêş muselleḧ kerd
teşrîf be tewaf «bît alḧiramErebî» berd
munacatiş kerd her take tawa
du’aş be hedef êcabet yawa
hatfê ama we goşiş derlad
wat pey muḧemmed xatir biker şad
bizan muḧemmed xuđayê daro
ce kûrey ayr nigaş međaro
«’ibdalimtilb» watiş ey hatef
muḧemmed ce kon ha ce kam teref?
wat ha ce saray wadî tehame
ne pay dirextê ałay peř xame
nîşten perê wêş be şadmanî
saẍ û siłamet be to mizganî
«’ibdalimtilb» ce ke’bey enwer
selaḧiş poşa řageş gêrit ne wer
se’d seqefî û wereqey nufeł
’umer hem çenêş her sê bê bedeł
dîşan muḧemmed meḧmûd muxtar
hane pay dirext mord mêrẍuzar
nîşten we tenha edeb çûn caran
meşẍûłen çenî ewraq daran
’umer persa lêş wat kênî tenha?
watiş muḧemmed êbin ’ebdułła
’umer ḧezretiş we lay babaş berd
«’ibdalimtilb» sakin bî ce derd
dîdiş kefit cemał xwacey ka’ênat
řoşin bî ce nûr şay ’alî sêfat
şukiraney ḧeq kerd be şadî û tereb
ta berdiş we lay amîney weheb
amîne çûn dîş satê şî ce hoş
cew dima dîsan bo nya we boş
«’ibdalimtilb» çend wiştir ce zeř
da be yetîman ’areban beř
dîsan ḧelîmeş temam ẍenî kerd
ce no ḧezretiş hem be ew siperd