گفتار در بیان بعضی از عجایب از آمنه شاهد شدن در شب ولادت و ذکر بعضی اخبار روز دیگر از تولد آن جناب سعادت
از کتاب:
روضة الصفا
اثر:
میرزا عبدالقادر پاوه‌ای (1850-1910)
4 دقیقه
602 مشاهده
هەم جە ئامینە مەنقوولەن ئەو شەو
واتش بێدار بیم ساتێ نەک جە خەو
لادێ لەرز کەردم عەتەش یاوا پێم
حەیران بیم ساتێ جە حاڵات وێم
دیم مورغێ سفید شیرین پەڕ و باڵ
ئاما نیشت جە لام چوون حاڵ زان حاڵ
یەک قەدەح لەب ڕێز ئاو خوشگەوار
ئاوەردش پەرێم وێنەی خدمەتکار
گومان مەبەردم داخۆ یە شیرەن
یا عەتر کافوور یا بۆی عەبیرەن
وەختێ کە نۆشام دیم دەوای دەردەن
چوون شەکەر شیرین چوون یەخاو سەردەن
جەمعێ جە زەنان شۆخ باڵا بەرز
گشت پەری پەیکەر ڕەند حووری تەرز
مەدان تەسکینم پەی پەی جەو حاڵەت
هەر یەک وە نەوعێ مەکەرد دەڵاڵەت
من هەم وە خەیاڵ قەوم مێهرەبان
مەواتم یاران داخۆ یە کێ بان؟
ئێمشەو چەنی من وەی تەور دڵ سافەن
ئەر هەن هەر ئەولاد «عَبدالمَنافعربی»ەن
بەڵێ مەعلووم بی جە دمای ئەوان
مامان هەر مامان تا کە هەفت شەوان
یەكێشان حەوا زەوجەی ئادەم بێ
یەکێ ئاسیە یەکێ مەریەم بێ
یەکێ سەفورای مووسای سەروەر بێ
یەکێشان سارا و یەکێ هاجەر بێ
ناگا دیبایێ سفید دیم جە سەر
ئاما توولانی بە ئەمر داوەر
دیسان نێدایێ وە سەمعم یاوا
واتش ئەو نەوهاڵ «جنت الماواعربی»
بپۆشاش جە خەلق پەنهان جە نەزەر
نەوینۆش وە چەم «ديار البشرعربی»
چەند گرۆی عەجیب بە شکڵ تیوور
وە باڵ و منقار ڕەنگ هەزار جوور
گشت وە موحەممەد سەر فروود ئاوەرد
هەر یەک وە نەوعێ شوکرانەی حەق کەرد
بەعزێ هەم ئێبریق جەواهر بە کەف
یەکسەر مەواتن بە من لاتەخەف
بە عەتر و عەبیر غوسڵ کەردشان
دەس دەس گشت سوجدەی شوکر بەردشان
جە قەسر بەیزا بۆی بخوور خێزا
جە من هەم عەرەق کافوور مەڕێزا
مەواتم ئەی کاش «عبدالمطلبعربی»
حازر مەبی پەی ئی گشت عەجایب
فریشتان عەرش بویناش وە چەم
گشت بڎا وە باد کۆی خەرمانەی خەم
قەسر و دەر و ماڵ نزیک تا وە دوور
یەکسەر بی تەمام وە یەک قەترە نوور
جە بان کەعبە کۆ کۆ نوور وارا
مەلایک سەف سەف عەلەم ونارا
وەختێ موحەممەد کەوت نە ڕووی دنیا
فەوری سوجدە بەرد وە تای بێ هەمتا
چوون کەسێ پەی وێش «تَضَرععربی» کەرۆ
پەنا و ئێلتێجا وە لای حەق بەرۆ
دەستش بوڵەند کەرد چەند دوعا وانا
جەو دما وە حوکم دانای تەوانا
یەک دەستێ هەنی پەیڎا بی جە غەیب
پۆشاش سەر تا پا، وە دیبای بێ عەیب
هۆرگێرت و بەردش غەیب بی جە نەزەر
من واتم هانا «الله اكبرعربی»
دیسان نێدایێ ئاما وە قایم
وات بەراش وە لای باباش ئێبراهیم
نەزەر کەرۆ لێش بنوازۆش زەریف
تا موشەڕەف بۆ بە دین حەنیف
هەم وە جای مەولوود ئەنبیاهان دا
بگێڵناش تەمام وە دەریاهان دا
تا ئەهل بێحار بزانان وە دەو
قەتعەن کوفر و شرک جە زەمانەی ئەو
گرۆی ڕۆحانی ئێنس و جن یەکسەر
ئاگا بان جە نوور شای «خير البشرعربی»
قاپی هێدایەت حەق کەردەن مەفتووح
سافی ئادەم و قورب دوعای نووح
تەوحید شیست و ئێتاعەی ئیدریس
تەقوای ساڵح و تەوانای جرجیس
مەرتەبەی هوود و موعجێزەی یەحیا
زوهد شوعەیب و زێکر زەکەریا
هێممەت و سەخای ئێبراهیم خەلیل
سوننەت ئێسحاق و زێبح ئێسماعیل
ئەعجاز لووت و ئەدعیەی خەرقیل
ئەوراد یوشەع ڕووزەی ئێستمۆئیل
سەبر ئەییوب و سەهم یەشعیا
سەوت داوود و سێدق ئەرمیا
ئەدویەی حێکمەت علووم لوقمان
تاج زولقەرنەین تەخت سولەیمان
زەکای «ذالكفلعربی» و زیرەکی شەمعوون
دوعای یونس و دەلیل هاروون
خشووع خزر و موعجێزەی موسا
پاکی ئەلیاس و ئەنفاس عیسا
سەد و بیست و چوار هەزار ئەنبیا
مەرتەبەی گشتم دا وە موستەفا
سەردار سەرخێڵ ئەنبیاهانەن
خاک پاک پاش تاج شاهانەن
پادشای دەوڵەت هەفت ئێقلیم وێشەن
ڕوتبەی شەفاعەت عاسیان پێشەن
خوەلاسە چەند سڕ، چەند عەجایبات
ئەو شەو جە ئێعجاز مەولوود ئەو زات
یەک جە شۆن یەک، ڕوو مەدا وە هەم
ئامینە ئەو شەو یەکسەر دی وە چەم