آمدن یهودیان شام به قصد قتل عبدالله در کنار شهر مکه و شکست خوردن ایشان
از کتاب:
روضة الصفا
اثر:
میرزا عبدالقادر پاوه‌ای (1850-1910)
4 دقیقه
372 مشاهده
جەو دەم هەفتاد کەس یەهوودان شام
گشت دلێر دلێر مەرد خوون ئاشام
گشت لێو غەرەز، وە دەندان گەستن
گشت کەمەر پەی قەتڵ عەبدوڵڵا بەستن
سوار بین وە جەخت هەی کەردن وە دەو
قەترە دان جە قین، یەڵغار دان وە شەو
تا وە یەک جەبەل مەکۆکەی زەریف
یەک ساعەت قەریب وە مەککەی شەریف
جەو دەم عەبدوڵڵا وە عەزم شکار
سوار بی وە ئەسب تا بەرشی جە شار
یاوا بەو جێگای کەمینگای ئێشان
ئەوانیچ هەم دین نەچیر وێشان
جەو دەم هەم «وهب بن عبدالمنافعربی»
جە شکارگای وێش ئەسب مەڎا پڕتاف
دیش هەفتاد سوار پەڕ سام سەنگی
یەهوود بێ شەرم دلێر جەنگی
داد وازان داد، دلێران کار
دەور عەبدوڵڵا گێرتن چوون حەسار
وەهب جە غیرەت توند بی نەهادش
چەنی چەند سوار شین وە ئێمدادش
جە ناگا هەم دیش یەک تیپ ڕەنگین
جە ڕووی ئاسمان ئامان وە زەمین
گشت تەرح عەجیب مەرد با وەقار
تەمام نەقاب پۆش گشت ئەبلەق سوار
گشت ساحێب هەیبەت حەربە گوزاران
تەشبیە وە مەخلووق دنیا نەداران
ناگا وێنەی شێر گشت حەمڵە بەردن
سپای یەهوودان تار و مار کەردن
جە بەرزی ئێقباڵ فەتح ئەو خەواس
عەبدوڵڵا نە چەنگ دوشمەن بی خەلاس
وەهەب واقێعەی وقووع دی وە چەم
حەیران مەند جە کار ڕەمز ئێبن عەم
موعاودەت کەرد هەم وە یانەی وێش
وات وە حەرەم ڕاز مەحرەمانەی وێش
واتش هەر ئێڎەن ڕەزای ئینجانب
بشۆ تا وە لای «عبدالمطلبعربی»
واتش گوڵێ هەن جە گوڵزار من
نە باغچەی عێسمەت کەس نەدار من
پاکەن، بێ عەیبەن، نەوبەر نمامەن
شۆخەن، شیرینەن، ئامینەش نامەن
حوسنش چوون خوەرشید نە پشت پەردەن
نە پەردەی عێززەت دایم پەروەردەن
پەرێ هام جفتێ پەی هام خوابەی شۆ
ئامینەم بەخشا وە عەبدوڵڵای تۆ
دایەی ئامینە فەوری تەشریف بەرد
«عبدالمطلبعربی» خاتر نیشان کەرد
چگوونەگی حاڵ فەرموودەی وەهەب
عەرز کەرد نە خدمەت ئەو عالی نەسەب
واتش با غەیرێ جەی سەرزەمینە
شاد نەبۆ وە دین دیدەی ئامینە
جفتش ئەگەر شا، ئەگەر گەڎا بۆ
خاس ئێڎەن با ئەو پەی عەبدوڵڵا بۆ
«عبدالمطلبعربی» شای بوڵەند کەوکەب
وە حوسن و عێسمەت ئامینە و وەهەب
وێش موتتەلێع بێ جە سەر تا قەدەم
تاهێر بێ چوون سەر چەشمەیی زەمزەم
قبوڵ کەرد وە دڵ وات موبارەک بۆ
مەبۆ کار خەیر جە تەدارەک بۆ
بینای کار خەیر شادی نیاشان
قورەیش گشت جەم بین جە بارگاشان
کەردش تەدارەک قوماش ڕەنگین
پارچەی ئەتڵەس ڕەنگ دیبای زیبای چین
جوملەی مەئکوولات حازر بی تەمام
جەم کەرد بزورگان مەککە و مێسر و شام
وە خاترخوای دڵ، وەهەب کەرد ڕازی
دەرسات وە مەجلێس تەڵەب کەرد قازی
وە ئەمر قودرەت دانای داوەری
زوهرە شی وە برج بەرز موشتەری
جە ساعەت سەعد وە حوکم ئەڵڵا
عەقد ئامینەش کەرد پەی عەبدوڵڵا
سازان بساتێ بەزم شاهانە
نە شا، بەڵ بەزمێ پێغەمبەرانە
مەلایک جە عەرش کەردشان شادی
داشان نە مەقام موبارەک بادی
مەششاتان عەرووس ئارایش کەردن
دەس دەس مەلبووسات پەرێش ئاوەردن
ئەو شەو مەهوەشان وە دڵەی پەڕ شاد
ئامینەشان بەرد وە یانەی داماد
تاکە دوو سێ ڕۆژ جە مابەین ویەرد
داماد نەزدیکی عەرووسش نەکەرد
بە قەوڵ ناقڵ «روضة الاحبابعربی»
وەی تەور جە مەکتووب کەردەنش خەتاب
دوو سەد جە مەحبووب قورەیش و حێجاز
شۆخ شەم ڕوخسار، شیرین غەمزە و ناز
گردین جە فێراق عەبدوڵڵا مەردن
ئاهـ و حەسرەتان وە تۆی خاک بەردن