آمدن جبرئیل به نزد حضرت آدم و ساختن مسجد «بيت المعمور» و مراجعت آدم و حوا به سراندیب
از کتاب:
روضة الصفا
اثر:
میرزا عبدالقادر پاوه‌ای (1850-1910)
2 دقیقه
668 مشاهده
یانی وە سەحرای مەککەی موبارەک
کەردشان ئەسباب تەهیە و تەدارەک
جبرەئیل نەزەر مەکەرد وە هەر خاک
گشت مەبی وە خشت سیم و تەڵای پاک
کەردشان مەسرووف حەسار ئاڵا
حەسار یەک نەزەر لوا وە باڵا
نامشان نیا وە «بيت المعمورعربی»
قیبلەی عاڵەم بۆ جە نەزدا و جە دوور
«حجرالاسودعربی» تەخت شای جەلیل
ئافەرید فڕەی باڵ جبرەئیل
فریشتان عەرش فەوری بەردشان
جە ڕوکن ئەو بەیت نەسب کەردشان
قاعێدەی حەجج و تەواف حەرەم
تەمام نیشان دان، یەک یەک وە ئادەم
جبرەئیل جە نۆ ئادەم وێداع کەرد
تەشریف خەیرش وە ئاسمان بەرد
ئادەم مەند وە جا چەنی یار وێش
مەشغووڵ بی چەنی کار و بار وێش
فەسڵ تابستان عەین گەرمی خوەر
جە تاو سەبوون شەرارەی شەرەر
جە مەککەی شەریف هێجرەت کەردشان
وە کۆی سەرئەندیب مەنزڵ بەردشان
بینای عەمارەت نیان پەی وێشان
فەرش ئاما جە غەیب چەند دەست پەرێشان
دیسان جبرەئیل موراجعەت کەرد
بەزر و ئەساسە و جفتێ گاو ئاوەرد
وات یە ئەو توخمەن تۆ مەیلت پێش بێ
ڕاسەن، خوڎاوەند تەقدیر وێش بێ
بەڵام ئی دانە وە بێ بەهانە
ئیسە ها دانەت، وە خاک بشانە
جەو دما چەندێ بەر مەیۆ جە خار
ماوەرۆ پەرێت خەروار وە خەروار
جە ڕاهان چۆڵ هەر زادت ئێڎەن
تا مەحشەر خوراک ئەولادت ئێڎەن