فریب خوردن شیرو و بە‌جا آوردن شیرو وصیت و سفارش شیرین را
از کتاب:
شیرین و خوسرەو
اثر:
خانای قبادی (1704-1778)
2 دقیقه
361 مشاهده
شێرۆ شنەفتن جە شیرین خەبەر
شکۆفەی شادیش جە دڵ کەرد ئەسەر
واتش بیناییم میننەت بە گیانم
هەرچی فەرمایی قۆچ قوربانم
خێزا و خورۆشا شێرۆی بێ کەماڵ
نەزاناش شیرین مدۆش بە لاماڵ
فەرماش بە مەردوم بە تەعجیل و تاو
جام ڕێز و کیسراش جە بن کەرد خراو
شەودێز کەردش پەی، باداوەر شکەست
تەڵای دەس ئەفشار قەهار کەرد بە قەست
نیکیسا بە تێغ جگەر هۆردڕی
باربود زوان، هەر دوو دەس بری
زریکەی شەودێز، زیڕەی نیکیسا
بێداد باربود دنیاش تواسا
خەزانەی خوسرەو ڕێزا بە سارا
دینار و درەم نەمەند جە دارا
چەپەر تاین کەرد نە موڵکو مەملووک
ئامان خەلایق جە چوار بلووک
کێشا هەی سەڵات تەمامی بە کۆ
جەم بین جەم ئارا نە دەور شێرۆ
مدران بە دوو سەف خەلایق بە دەو
نە قاپیی شێرۆ تا قەبر خوسرەو
قازی تەڵەب کەرد عەقد شیرین بەست
نیاش بینای بەزم شادی بە دڵ وەست
جە شەوق و شادی خورۆشا جە سەر
نەزاناش مەیۆ بە چۆپی چەمەر
مواتش شیرین سەفای شاڵشەن
نەزاناش بە قەست سەر و ماڵشەن
گەردوون بە قەسدش هەر ها نە ڕەنگدا
شیشەی شکۆفەش بدۆ بە سەنگدا
شێرۆ بێ خەبەر جە ڕومووز ڕەنگ
جە سۆز سازان، سەدای دەف و چەنگ
سازان سەمتوور تەرز تەمووران
چار تار و چل تار چاغیر زەرووران
بووق و باڵەبان نەغمەی نەی نەواز
کەنیزان ڕەند ڕەقس بازی باز
خورۆش خۆش خوان چل تار و چل تەنگ
دەنگ تەپڵی باز سەنج خۆش ئاهەنگ
سەرداران سەرمەست جە نام بادە
خانان، سوڵتانان، مەدهۆش فتادە
خواجە سەرایان بادەی مەی فرۆش
بازی کەنیزان سەرمەست و مەدهۆش