firîb xurdin şîru û beca awirdin şîru wisît û sifarş şîrîn ra
From the Book:
Şîrîn û Xusrew
By:
Khana Qubadi (1704-1778)
2 minutes
208 views
şêro şineftin ce şîrîn xeber
şikofey şadîş ce dił kerd eser
watiş bînayîm mînnet be gyanim
herçî fermayî qoç qurbanim
xêza û xuroşa şêroy bê kemał
nezanaş şîrîn midoş be lamał
fermaş be merdum be te’cîl û taw
cam řêz û kîsraş ce bin kerd xiraw
şewdêz kerdiş pey, badawer şikest
tełay des efşar qehar kerd be qest
nîkîsa be têẍ ciger hordiřî
barbud zwan, her dû des birî
zirîkey şewdêz, zîřey nîkîsa
bêdad barbud dinyaş twasa
xezaney xusrew řêza be sara
dînar û direm nemend ce dara
çeper tayn kerd ne mułku memlûk
aman xelayq ce çwar bilûk
kêşa hey sełat temamî be ko
cem bîn cem ara ne dewr şêro
midran be dû sef xelayq be dew
ne qapîy şêro ta qebir xusrew
qazî tełeb kerd ’eqid şîrîn best
nyaş bînay bezim şadî be dił west
ce şewq û şadî xuroşa ce ser
nezanaş meyo be çopî çemer
mwatiş şîrîn sefay şałşen
nezanaş be qest ser û małşen
gerdûn be qesdiş her ha ne řengida
şîşey şikofeş bido be sengida
şêro bê xeber ce řumûz řeng
ce soz sazan, seday def û çeng
sazan semtûr terz temûran
çar tar û çil tar çaẍîr zerûran
bûq û bałeban neẍmey ney newaz
kenîzan řend řeqis bazî baz
xuroş xoş xwan çil tar û çil teng
deng tepłî baz senc xoş aheng
serdaran sermest ce nam bade
xanan, sułtanan, medhoş fitade
xwace serayan badey mey firoş
bazî kenîzan sermest û medhoş