جواب دادن شیرین شیرو را و مهلت خواستن از شیرو
از کتاب:
شیرین و خوسرەو
اثر:
خانای قبادی (1704-1778)
2 دقیقه
373 مشاهده
شیرین شنەفتن جە شێرۆ خیتاب
بە زاری و زگار پەنەش دا جواب
واتش: ئەی شێرۆ مەر شەرمت نیەن
زوڵمێ بەی دەستوور هەرگیز کێ دیەن؟
بزورگێ وێنەی خوسرەو مەردەبۆ
من بەرگ سیام سێوەنگ کەردەبۆ
جەمین جام زووخ دەروون داخی
سەرتاپا سەواد سیا قەڵاخی
مەردە مۆی مەلوول سەردار سەرنیگوون
غەڵتان خاشاک زێر خاک و خوون
بێوەی سیا بەخت سفتەی سیاپۆش
بەرگ ئازیەتی قەڵاخی نە دۆش
خوسرەو مەردەبۆ من بەی حاڵەوە
بە شین و شیوەن کەمەر لاڵەوە
شێرۆ مەر تۆ گەور یا فەرەنگەنی
تەرسای نەسارا دڵ جە سەنگەنی
ئەر سەد کە هەژار، ئەسیر تۆنیم
دیل دەس بەستە، دەسگیر تۆنیم
بێ نەوا و بێکەس، زووخ پێ وەردەنیم
هەر جارێ خزمەت بابۆت کەردەنیم
بزانە بە حەق خدمەت گوزاری
مبۆ زەلیلان مەنزوور بداری
نە ڕای جەور یام جەفای ڕۆزگار
مبوون بە سەرژان واتەی ڕۆزگار
ئیسە م کەروون شادی بە دڵدار
تۆ بە ئەسیران مەبەر ستەمکار
پەرێ تۆ بێ جا، پەی من بەعیدەن
هەم تیر تانە نە جەرگ وێمەن
حەرفێ مواچوون مەکەرە ستێز
بینا بە خاتر مەزار پەروێز
موهڵەت بدە پێم تا بە چهل شەو
بگێروون تەعزیم تەعزیەی خوسرەو
شەو شام و خەیرات جە وەر جەنازەش
تەمام کەروون تەوق تەعزیم تازەش
فکر و خەیاڵ کەرد مەر شێرۆ شێتەن
نامەردت کەران یە بابۆی وێتەن
تا بە چهل ڕۆ موهڵەت بدەر پێم
سامان دەروون کار سەرەنجام وێم
ئەوسا جەودما هەرچی ڕەزاتەن
شیرین نە فەرمان فەسڵ قەزاتەن
وەر نەشنەوی حەرف سەریح واچوون پێت
پەشیمان مبی جە کردار وێت
سەوگەند بەو سەنەم خاچ بێ دەرێغ
مشکاووون پەردەی جەرگ وێم بە تێغ
واتش: بە شێرۆ من ئێدەن ڕەزام
ئیختیار بە تۆن، باقی «وَالسَّلامعربی»