احضار کردن شیرو شیرین را به مجلس خویش و نیامدن شیرین و او را به زور کشیدن
از کتاب:
شیرین و خوسرەو
اثر:
خانای قبادی (1704-1778)
2 دقیقه
195 مشاهده
نەکەردن حیجاب جە شەرم شیرین
بێ خۆف جە خوسرەو، جە گیان شیرین
کێشان بە کەشان میر غەزەب خوو
بەردشان شیرین پەی شێرۆی بەدخوو
بەو تەورە بە زۆر کێشاشان درێخ
چەند تا جە گێسووش هۆرکنیا جە بێخ
زایەڵەی زاری، خورۆش هەیجا
خێزا جە حەرەم سەراپەردەی شا
بانوو کەنیزان تاقی تەڵا ڕێز
تەڕڵان تەتاران، توحفەی تورک بێز
کڵاو زەڕینان سەیل ئەسرین دا
واریان بە ڕووی باڵای شیریندا
ئەو جام جەمینان بە داد بێحەد
زوڵفان کەردن پەی، گێسوو کەردن قەد
جقەی تاج و تەل هەوا دان نە خاک
حەریر و واڵا کەردن بە سەد چاک
کێشان بانگ بەرز بە ئەشک خوون ڕێز
بە داد و فەریاد چڕین بە پەروێز
واتن: جە کۆنی شاهـ شێر زەر
بوینە شێرۆی شوومت چێشش کەرد
کەنیزان بە زار، بە شۆڕشت شەڕ
واوەیلا و وەی ڕۆ نە دەور سەروەر
شیرین بە کێشان، کەنیزان بە زار
تا یاوان وەلای شێرۆی ستەمکار
یاوان بە پابۆس شووم بەد بونیاد
یەکسان کەنیزان خورۆشان بە داد
مدرا بە ئەدەب شیرین خەرامان
جە شەرم شێرۆ سەر وست نە دامان
سەر هۆرداش نە خاو شێرۆی سیا بەخت
تەکلیف کەرد شیرین بنیشۆ نە تەخت
شیرین دا جواب بە زاری و مەلوول
بە هام نشینی نەکەردش قەبووڵ
واتش: من سەفیل سفتەی سیاپۆش
بەعیدەن جە من شادی و عەیش و نۆش
من وەردەی ئەسیر، سەر بێ سەرەنجام
سەردار سەرنیگوون، زەدەی زووخ زام
هەنی شەوق و زەوق، وەشیی من کامەن؟
شادیی ڕۆزگار پەی من حەرامەن
سەر نێش خاران ئێش و نێشمەن
هەنی تەخت و تاج پەرێ چێشمەن
خار خەم نە جای خورد و خاومەن
عەیش و هەم نیشات جە کۆ باومەن
بەی تەور دا جواب شێرۆی بەد فەرجام
دەست بەستەی خدمەت مدرا بە مەقام