aḧzar kirdin şîru şîrîn ra bih micils xwîş û nyamdin şîrîn û aw ra bih zur kişîdin
Li pirtûka:
Şîrîn û Xusrew
Berhema:
Xanayê Qubadî (1704-1778)
2 Xulek
401 Dîtin
nekerdin ḧîcab ce şerim şîrîn
bê xof ce xusrew, ce gyan şîrîn
kêşan be keşan mîr ẍezeb xû
berdişan şîrîn pey şêroy bedxû
bew tewre be zor kêşaşan dirêx
çend ta ce gêsûş horkinya ce bêx
zayełey zarî, xuroş heyca
xêza ce ḧerem seraperdey şa
banû kenîzan taqî teła řêz
teřłan tetaran, tuḧfey turk bêz
kiław zeřînan seyl esrîn da
waryan be řûy bałay şîrînda
ew cam cemînan be dad bêḧed
zułfan kerdin pey, gêsû kerdin qed
ciqey tac û tel hewa dan ne xak
ḧerîr û wała kerdin be sed çak
kêşan bang berz be eşk xûn řêz
be dad û feryad çiřîn be perwêz
watin: ce konî şah şêr zer
bwîne şêroy şûmit çêşiş kerd
kenîzan be zar, be şořişt şeř
waweyla û wey řo ne dewr serwer
şîrîn be kêşan, kenîzan be zar
ta yawan welay şêroy sitemkar
yawan be pabos şûm bed bunyad
yeksan kenîzan xuroşan be dad
midra be edeb şîrîn xeraman
ce şerim şêro ser wist ne daman
ser hordaş ne xaw şêroy sya bext
teklîf kerd şîrîn binîşo ne text
şîrîn da cwab be zarî û melûl
be ham nişînî nekerdiş qebûł
watiş: min sefîl siftey syapoş
be’îden ce min şadî û ’eyş û noş
min werdey esîr, ser bê serencam
serdar sernîgûn, zedey zûx zam
henî şewq û zewq, weşîy min kamen?
şadîy řozgar pey min ḧeramen
ser nêş xaran êş û nêşmen
henî text û tac perê çêşmen
xar xem ne cay xurd û xawmen
’eyş û hem nîşat ce ko bawmen
bey tewr da cwab şêroy bed fercam
dest bestey xidmet midra be meqam