غزل خواندن نکیسا از زبان شیرین
از کتاب:
شیرین و خوسرەو
اثر:
خانای قبادی (1704-1778)
3 دقیقه
430 مشاهده
نیکیسای لاڵ سەنج، دانای موو شکاو
نە پەردەی «ماهوور» نەوای کونج کاو
دانەی چیهرەی چەنگ شۆخ پەنجە و دەست
واناش ئەی غەزەل مەستانە مەست مەست
واتش: ئەرێ هەی بینایی عەینم
جەلابەخش زەنگ ئاینەی زەینم
هەرتا زیندەنان گیانم نە ڕاتەن
تووتیای دیدەم غوبار پاتەن
جە زەوق باڵات بەرزەن دەماغم
ڕەوشەنەن جە شەوق حوسنت چراغم
ئیمنانم، ئیمشەو ئەر پێت زەروورەن
بنۆشی بە شاد، عەیشت مەنزورەن
مەنۆشە ئەو مەی ناسازگارەن
بادەی مەیگوون لەعل من خۆش گوارەن
بۆ بنۆش بە شاد جە لەعلم ئەی مەی
کەسێ جە شاهان شەراب نۆش کەی
بەی تەور جە بادەی گوار گوڵنام
نۆنۆشان هەرگیز، نەکەردەن نە جام
ئەی بادە وەشەن تا بنۆشی تۆ
شیرین بواچۆ نۆش گیانت بۆ
خوسرەو، بەو دانا ئاگای گشت حاڵەن
شیرین عومرم وە بێ تۆ تاڵەن
بە گیانت سەوگەند هامڕاز دەردم
من ئەی گومانە جە تۆ نەبەردم
وەختەن با دەرد بکەرۆ پەستم
جە ڕای مەرحەمەت بگێرە دەستم
خووب ئیسە تا کەی مکەریم مەهجوور
با جارێ بقاڵات بوینوون جە دوور
کەی بۆ من نە جام لەبانت چون مەست
خاو بگنۆ وەنەم تا مەحشەر یەک دەست
کەی بۆ ئەو باڵات بنمانۆ چون تووڵ
شەوێ پشتان بوون چون مێو مەفتوول
کەی بۆ من چەنی چون تۆ خوسرەوێ
بنۆشوون بادەی یاقووتی شەوێ
جون جە ئاستانەت بێخود کێشام ڕەخت
جە سەختیی سەودا ویم کەردم ڕوو سەخت
مروەتەن چەنیم جەوانمەردی کەر
دەردەدار تۆم، دەوای دەردم دەر
با جە بێ مەیلیت شای دارا شکۆ
نەگنۆ وە مەحشەر داوای ئیمە و تۆ
ئەر سەد تەقسیرم جە حەد ویەردەن
چون قاپیی تۆ من ڕووم ئاوردەن
ببەخشەم تەقسیر بە سەرگەرد ڕێت
یاگەی ئومێدی، ئومێدم هەن پێت
فیدات بام وەس دەر پەنەم خەجاڵەت
ئەر پادشانی ساحێب عەداڵەت
دەمێ تۆش کەردەن بەی تەور خاترڕێش
بگێرە ئەو دەم، خاس دەم بنیە تێش
شۆخێ وینەی من تۆش دلگیر کەردەن
سزاش هەر ئێدەن تا بە ڕۆی مەردەن
هەر شەو تا بە ڕۆ بۆ بنیە نە بۆش
قایم بوشارە شەمامەی لیمۆش
سا وەسەن، تا کەی چەنیم ناسازی؟
چێش مبۆ جارێ شیرین بنوازی؟
بنجینەی عومرم جە بێخ هۆرکنیا
ساز بەدنامیم نە دنیا ژنیا
ئەڵڵا من پەی تۆ چەند جەفام کێشان
چەند پەی تۆ نیشتم خاتر پەرێشان
تۆ خۆ جە ژێر سای گەردوون گەردان
بێ مروەتیت کەرد وێنەی نامەردان
کارێ نەکەردی بە نیاز من
نەکێشای زەرڕێ غەمزە و ناز
جە گشت بابەتێ وەنەم کەردی زۆر
تەقسیر جە تۆ بی، هەم تۆ کەردت تۆر
ئیسە جەی دما تا گیان مسپاروون
نە ئاستانەی تۆ دنیا مویاروون
هەر بەی ئومێدە بە دڵواز دڵ
ڕوێ مرادت جە لام بۆ حاسڵ
نیکیسا وەی نەزم نەزاکەت بێ شۆ
خورۆش وست نە گیان شای دارا شکۆ