ẍizil xwandin nikîsa az ziban şîrîn
From the Book:
Şîrîn û Xusrew
By:
Khana Qubadi (1704-1778)
3 minutes
429 views
nîkîsay lał senc, danay mû şikaw
ne perdey «mahûr» neway kunc kaw
daney çîhrey çeng şox pence û dest
wanaş ey ẍezel mestane mest mest
watiş: erê hey bînayî ’eynim
celabexiş zeng ayney zeynim
herta zîndenan gyanim ne řaten
tûtyay dîdem ẍubar paten
ce zewq bałat berzen demaẍim
řewşenen ce şewq ḧusinit çiraẍim
îmnanim, îmşew er pêt zerûren
binoşî be şad, ’eyşit menzuren
menoşe ew mey nasazgaren
badey meygûn le’il min xoş gwaren
bo binoş be şad ce le’ilim ey mey
kesê ce şahan şerab noş key
bey tewr ce badey gwar gułnam
nonoşan hergîz, nekerden ne cam
ey bade weşen ta binoşî to
şîrîn bwaço noş gyanit bo
xusrew, bew dana agay gişt ḧałen
şîrîn ’umirim we bê to tałen
be gyanit sewgend hamřaz derdim
min ey gumane ce to neberdim
wexten ba derd bikero pestim
ce řay merḧemet bigêre destim
xûb îse ta key mikerîm mehcûr
ba carê biqałat bwînûn ce dûr
key bo min ne cam lebanit çun mest
xaw bigno wenem ta meḧşer yek dest
key bo ew bałat binmano çun tûł
şewê piştan bûn çun mêw meftûl
key bo min çenî çun to xusrewê
binoşûn badey yaqûtî şewê
cun ce astanet bêxud kêşam řext
ce sextîy sewda wîm kerdim řû sext
mirweten çenîm cewanmerdî ker
derdedar tom, deway derdim der
ba ce bê meylît şay dara şiko
negno we meḧşer daway îme û to
er sed teqsîrim ce ḧed wiyerden
çun qapîy to min řûm awirden
bibexşem teqsîr be sergerd řêt
yagey umêdî, umêdim hen pêt
fîdat bam wes der penem xecałet
er padşanî saḧêb ’edałet
demê toş kerden bey tewr xatiriřêş
bigêre ew dem, xas dem binye têş
şoxê wîney min toş dilgîr kerden
sizaş her êden ta be řoy merden
her şew ta be řo bo binye ne boş
qaym buşare şemamey lîmoş
sa wesen, ta key çenîm nasazî?
çêş mibo carê şîrîn binwazî?
bincîney ’umirim ce bêx horkinya
saz bednamîm ne dinya jinya
ełła min pey to çend cefam kêşan
çend pey to nîştim xatir perêşan
to xo ce jêr say gerdûn gerdan
bê mirwetît kerd wêney namerdan
karê nekerdî be nyaz min
nekêşay zerřê ẍemze û naz
ce gişt babetê wenem kerdî zor
teqsîr ce to bî, hem to kerdit tor
îse cey dima ta gyan misparûn
ne astaney to dinya muyarûn
her bey umêde be diłwaz dił
řwê miradit ce lam bo ḧasił
nîkîsa wey nezim nezaket bê şo
xuroş wist ne gyan şay dara şiko