ẍizil giftin nikîsa az ziban şîrîn
From the Book:
Şîrîn û Xusrew
By:
Khana Qubadi (1704-1778)
3 minutes
249 views
îmcar nîkîsa zerîf be endaz
çing da ne řûy çeng şox awaz
ne perdey «mahûr» merkeb humayûn
bey tewr înşa kerd ey şî’ir mewzûn
dił ce nedînit bî be watey ’am
binmane bałat, we sergerdit bam
cey muşkîn kemend kiłaf sosenî
cey şîrîn řend şox ermenî
ta key, bê mirwet, bey tewr bêzarî?
ta key minmanî to peneş xwarî?
şîrîn ermen ce bê kemałî
er danş çenît demê be tałî
cerîmeş êden şay dara demax
bistano cew dem maçê be gustax
zułfim er danş be şa xecałet
sîlsîleş beden, esiłş be nalet
er zamit ce tîr nîgam xeteren
nîgam turken turk, turk her kafren
er ce egrîcem cergit piř îşen
’eqreben ’eqreb, gunay min çêşen
min be wêm ẍemze be toda kerden
to paset zanan min meylim serden
naz û ẍemzey min derûnit kerd řêş
be mîrat gino pey saḧêb wêş
çun řûgerdanî bey tewr aman pêm
buyer ce teqsîr, terîqim ce wêm
tewbe bo er lêm bidey sed xencer
emcar ce emirit berneşûn weber
me’lûm bo beẍeyr lebanit fêşter
er ’ałem piř bo ce şîr û şeker
sewgend be zatê dûr ce zewałen
be za’îqey min gişt tirş û tałen
sa bo çun ḧorî ḧeq şerîf kerdem
ce baẍçey řengîn ’îsmet perwerdem
hîçkes neçnyen guł ce baẍ min
neyawan boy kes be demaẍ min
pey to çun piste min şeker xendim
bo dem şîrîn ker ce şîrey qendim
nîkîsa bey nezim nazenîn ew şew
xuroş wist ne bezim řengîn xusrew
ẍizil xwandin barbid az ziban xisru
barbud sermest ce badey serxum
penceş da ne řûy sertay hewrêşim
be pencey nehufit pencey kaw xara
ey ẍezel bey tewr kerd aşkira
wat: îmşew nesîm wenewşey baxim
mido cun şewbo bo ne demaxim
boyî bey tewre bo ’ebîrîn bo
mer boy çîn zułf şox şîrîn bo
meger mang yawan be řewzey guł geşt
sara bo mido çun řewzey beheşt
meger şew benden be ołgey lahûr
be cay wefir serd mwaro kafûr?
mer xusrew ne baẍ şîrîn ne geşten
macî serzemîn ’enber siruşten
mer ahûy şoxê ce řem řem kerden
boy bezim perwêz xuten perwerden?
mer biben ’ennab şeker xurde řêz
maçî tûtyen şahî çun perwêz
mer mang řexşanen ne çerx exzer
îmşew şew byen ce řo řoşniter?
mer şîrîn ce le’il meygûn mey noşen
goşey her bezmê piř ne xiroşen
mer cemîn wêş ew ne cam dyen
qedir n zanan bey tewr řam byen
er hey şîrîn řaz nebat min
çendan xo nebî teqsîrat min
řût awerd ne yek, ’erzem newanay
be ḧał cestey xestem nezanay
xo şîrîn er sed min şay cem şikom
emirit muta’en, min her bendey tom
er sed firawan şahê řengînim
min her canfîday şêwey şîrînim
dił ḧeyran be terz bałay tûł tom
bestey sîlsîley zułf lûl tom
sa bo ba nemrûn be dax towe
bikerrûn lîmoy weşbot we bowe
çun mêw meftûl piştan bîn wehem
lîmo we ban lîmo, dem ce naw dem
be xełwet xeylê binîşim we şad
koy xerman xem biderîn we bad
barbud cey şî’ir şox ’enberîn
şîwen wist ne gyan şîrîn şîrîn