ẍizil giftin barbid az ziban xisru
From the Book:
Şîrîn û Xusrew
By:
Khana Qubadi (1704-1778)
2 minutes
402 views
barbud çoge newbeş kefit we dest
ce «perdey ’uşşaq» neway xara best
xaster ce neẍmey enguşt şanaz
berbet be mîzab awerd ne perwaz
watiş: seḧer zû ne goşey baẍê
wiyerdim serşar be xoş demaẍê
dîm new baẍeda muşkîn ’uzarê
şoxê, sermestê, zułf ’enberbarê
mwatit be ḧusin ḧorîy beheşten
be qamet çun sewł ’enber siruşten
nimez ew şabaz piř lare û piř lenc
çon pêçyabê new baẍda çun genc
er lałê cew genc bigno ne sara
minyewş ne ferq cun tac dara
sewgend be dîdeş bê surmey sêweng
dû terkeş besten çun tersay fereng
be qews qetran ebroy qeza coş
be xał muşkîn mabeyn lîmoş
be destey zułfiş saf bo guławen
çîn çînş lûlen, çîn çînş xawen
be şołey ḧusinş çun şołey nûren
nayb şewqiş tecelîy tûren
be durc yaqût piř ce mirwarîş
be xendey piř naz tebessum karîş
be řêzey řaziş şeker barşen
qurs şîrey qend şerbetdarşen
be safîy zinciş çun sîf zerden
be fîrozey xał ḧeq şerîf kerden
be muşkîn kemend kiłaf gêsûş
be dugmey yaqût yexey ’enberboş
be çîn ḧey tar pexşen ne doşiş
be çenber bazîy goşwarey goşiş
be goy ẍebẍebiş maçî qetrey aw
mu’elleq midran ne pay aftaw
be dû memanş behem peywesten
çun şax mercan be řengîm řesten
be sîney sîmş ha ne toy camş
şewq mido çenî zerdîy şemamş
be şoxîy şîrîn sinay’ eyyam
kêşanş wêney şûş nuqrey xam
be sîmîn saqiş bilûr safen
be ḧetir nafiş piř muşk nafen
er bignom be des mibom we fîdaş
mimałûn ne çem sed car xak paş
er sed padşam her ta ke zîndem
pey ew be îxlas kemter ce bendem
barbud bey nezim namey ’ebîrîn
şor xusrew wist ne gyan şîrîn