ẍizil giftin nikîsa az ziban şîrîn
From the Book:
Şîrîn û Xusrew
By:
Khana Qubadi (1704-1778)
2 minutes
222 views
ewweł nîkîsa horgirt saz û çeng
be perdey «newroz» xara kerd aheng
be řengê ew şox şîrîn ferma pêş
nała mestane çenî çeng wêş
watiş: «alẍyasArabic» esir meynet řîz
ḧełq awêz zułf ḧełqey serawêz
îmşew nazarit xo ne zaweten
namerdit keran sa çun xaweten?
nimez ce konî semen boy umîd
wexten ce meşrîq řewşen bo xurşîd
ce şewq şu’leş çun tecelay tûr
perdey derûnit piř bibo ce nûr
ce koy ey salar serkeş wêney cem
şikist der supay serhengan xem
er to bipirsî ḧał min çûnen
cergim let leten, dił mewc hûnen
nedînit pey řoy řestaxêzen
derûnim ce zûx zamit leb řêzen
şew qirçey cergim sê fersex mişo
řasten sa qirçeş neyawan be to
sewgend be bałat nadîrey eyyam
cewsawe bałat dûr keften ce lam
ce za’îqem mey jar hefit tasen
surme ne dîdem řîzey ełmas
pey to seyr baẍ baẍçey ’enberbar
migezom ẍunçeş wêney nêş mar
şewan ce daxt dił bê qeraren
xaw řaḧetim çun mewday xaren
sewday to ey dost kerden pa bestim
îftadem, carê bigêre destim
ełła çi temay xas be to daşim
ẍełet bî herçî ce to pundaşim
erê dewa bexiş zamit her be so
er nîm sizawar peristarîy to
minîşûn pey wêm ne astaney to
destê mişorûn ne pêşxaney to
er maçî na xas hem na îxlasim
xo pey awkêşîy metbext xasim
sa ya keftenan ce şehryarî
kenîzim herçî penem misparî
er xak małyen, er cařûkeşî
mawerûn be ca, nyen ce xoşî
ẍerîbim, bê naz, zammen xeter
her to mişnasûn ḧeq ne bałay ser
nîkîsa bey tewr çun kerd řestixêz
şor şîrîn west ne gyan perwêz