غزل گفتن باربد از زبان خسرو
از کتاب:
شیرین و خوسرەو
اثر:
خانای قبادی (1704-1778)
2 دقیقه
403 مشاهده
باربود چۆگە نەوبەش کەفت وە دەست
جە «پەردەی عوششاق» نەوای خارا بەست
خاستەر جە نەغمەی ئەنگوشت شاناز
بەربەت بە میزاب ئاوەرد نە پەرواز
واتش: سەحەر زوو نە گۆشەی باغێ
ویەردم سەرشار بە خۆش دەماغێ
دیم نەو باغەدا موشکین عوزارێ
شۆخێ، سەرمەستێ، زوڵف عەنبەربارێ
مواتت بە حوسن حۆریی بەهەشتەن
بە قامەت چون سەوڵ عەنبەر سروشتەن
نمەز ئەو شاباز پڕ لارە و پڕ لەنج
چۆن پێچیابێ نەو باغدا چون گەنج
ئەر لاڵێ جەو گەنج بگنۆ نە سارا
منیەوش نە فەرق جون تاج دارا
سەوگەند بە دیدەش بێ سورمەی سێوەنگ
دوو تەرکەش بەستەن چون تەرسای فەرەنگ
بە قەوس قەتران ئەبرۆی قەزا جۆش
بە خاڵ موشکین مابەین لیمۆش
بە دەستەی زوڵفش ساف بۆ گوڵاوەن
چین چینش لوولەن، چین چینش خاوەن
بە شۆڵەی حوسنش چون شۆڵەی نوورەن
نایب شەوقش تەجەلیی توورەن
بە دورج یاقووت پڕ جە مرواریش
بە خەندەی پڕ ناز تەبەسسوم کاریش
بە ڕێزەی ڕازش شەکەر بارشەن
قورس شیرەی قەند شەربەتدارشەن
بە سافیی زنجش چون سیف زەردەن
بە فیرۆزەی خاڵ حەق شەریف کەردەن
بە موشکین کەمەند کڵاف گێسووش
بە دوگمەی یاقووت یەخەی عەنبەربۆش
بە چین حەی تار پەخشەن نە دۆشش
بە چەنبەر بازیی گۆشوارەی گۆشش
بە گۆی غەبغەبش ماچی قەترەی ئاو
موعەللەق مدران نە پای ئافتاو
بە دوو مەمانش بەهەم پەیوەستەن
چون شاخ مەرجان بە ڕەنگیم ڕەستەن
بە سینەی سیمش ها نە تۆی جامش
شەوق مدۆ چەنی زەردیی شەمامش
بە شۆخیی شیرین سنایع ئەییام
کێشانش وێنەی شووش نوقرەی خام
بە سیمین ساقش بلوور سافەن
بە حەتر نافش پڕ موشک نافەن
ئەر بگنۆم بە دەس مبۆم وە فیداش
مماڵوون نە چەم سەد جار خاک پاش
ئەر سەد پادشام هەر تا کە زیندەم
پەی ئەو بە ئیخلاس کەمتەر جە بەندەم
باربود بەی نەزم نامەی عەبیرین
شۆر خوسرەو وست نە گیان شیرین