پاسخ دادن خسرو شیرین را
از کتاب:
شیرین و خوسرەو
اثر:
خانای قبادی (1704-1778)
3 دقیقه
393 مشاهده
شا دیش جە شیرین ئەو بێ نیازی
سوپەر وست نە دۆش پەی شمشێر بازی
وات: ئەرێ شیرین چەشم و چراغم
هومای گوڵشەنم، تاوس باغم
زەوق و زینەت بەخش تاج و سەریرم
هەم جە پا ئەفگەن، هەم دەست گیرم
بیللا غەیر جە تۆ نییەن غەمخوارم
دڵبەرم تۆنی، تۆنی دڵدارم
جە یومنت، قیبڵەم، سەعیدەن بەختم
پەی وەسڵت بێزار جە تاج و تەختم
بە دین باڵات دایم موحتاجم
جە فەڕڕت ساحێب ئەی تەخت و تاجم
من کە هەر جە دەور دنیا تۆ داروون
پەی چێش ڕەزاتەن گیان مسپاروون
مروەتەن شیرین شای شەربەت ڕازان
تەواو شەش دانگ دەستەی شابازان
بۆ زەوق و شادیم تۆ بەتاڵ مەکەر
سەرتاپای باڵام بە زوخاڵ مەکەر
چونکە شیرینی عەیشم تاڵ مەکەر
پەردەی دەروونم بە زوخاڵ مەکەر
داخدارم جە تۆ، بۆ داخم مەکەر
گوناکار خۆ نیم، وستاخم مەکەر
دەسم دامانت شیرین گەنجە
وەسەن ئەی شۆخی، ئەی لار و لەنجە
ئەرێ سۆسەن گوڵ، گوڵ بۆی گوڵ ئەندام
گەردەن مینای ساف، جەمین وێنەی جام
بۆ نازێ مەکەر زام پێ تازە بۆ
نازیچ ئەو خاسەن بە ئەندازە بۆ
تۆ بەی غەمزە و ناز یا ئەروام بەردی
غەمزە و ناز وەسەن، جە گیانم کەردی
تۆ خۆ کێشانت ئەی ئاهـ سەردە
خەستەنی جە بار سەنگیی ئەی دەردە
مبیا بە حاڵم تۆ خاس بزانی
ئەوەند مسیبەت پەنەم منمانی
پەی چێش؟ نە منیچ خەستەی دەرد تۆم؟!
دڵ پڕ جە مەینەت ئاهـ سەرد تۆم؟!
ئێد کە مواچوون، باڵا زەڕ ستوون
خیلافش نییەن بە زات بێ چوون
ئەر شیرین جە داخ شەکەر لێم تاڵەن
شەکەر جە لای من وێنەی قرژاڵەن
ڕاستەن شۆخ وشەنگ زوڵف عەبیرینەن
کەی شەکەر جە لام چون تۆ شیرینەن؟
وەس کەر بە شەکەر شیرینی لێم تاڵ
شیرینیی شەکەر بەرکەر جە خەیاڵ
نەمەندەن تابم، تاقەتم بڕیان
زەنگ بەد نامیم نە عاڵەم زڕیان
ئەر بزورگەنی وەسەن بەهانە
بکەر جە بارەم لوتف شاهانە
وەخت عیش و نۆش بادەی گوڵ ڕەنگەن
نە وەخت دەعوا و گلەیی و جەنگەن
وەسەن، وەس دەرەم دەرد سەر ئیمشەو
مبوون بە زوخاڵ تا سەحەر ئیمشەو
ئەگەر نەنێروون بۆ نە بۆت ئیمشەو
حازر کەر پەرێم یەک تابووت ئیمشەو
ئیمشەو ڕوخسەت دەر هەی شای ئەرمەنی
سەوڵ سیم ئەندام کڵاف سۆسەنی
بکەروون بە شاد گوڵ گەشت جە باخت
تا کە ساکن بۆ دەروون جە داخت
وەر نە بیسمیللا مشوون بە ڕاوە
مەحبووب قات نییەن بە ڕووی دنیاوە
مکەروون سەودای عەشقت فەرامۆش
نە جامێ هەنیچ مەی مکەروون نۆش
شەرت بۆ بکەروون ئەو زوڵف عەبیرین
بە حەڵوای شەکەر کام وێم شیرین
جە قینت دیسان شۆخەکەی سەرمەست
هەم شەکەر نامێ باوەروون بە دەست
جە شیرینیی شەهد شیرەی ئەو شەکەر
جە دڵ تاڵیی تۆ بەرکەروون وەبەر
تۆ خودا خێرت دۆ، قسەت درازەن
پیشەت هیچ نییەن، هەر غەمزە و نازەن
کۆتا کەر سوخەن، وادەی دەستوورەن
مشوون بە ڕاوە، مەنزڵم دوورەن