pasix dadin xisru şîrîn ra
From the Book:
Şîrîn û Xusrew
By:
Khana Qubadi (1704-1778)
3 minutes
442 views
şa dîş ce şîrîn ew bê nyazî
super wist ne doş pey şimşêr bazî
wat: erê şîrîn çeşim û çiraẍim
humay gułşenim, tawis baẍim
zewq û zînet bexiş tac û serîrim
hem ce pa efgen, hem dest gîrim
bîlla ẍeyr ce to nîyen ẍemxiwarim
diłberim tonî, tonî diłdarim
ce yuminit, qîbłem, se’îden bextim
pey wesiłit bêzar ce tac û textim
be dîn bałat daym muḧtacim
ce feřiřit saḧêb ey text û tacim
min ke her ce dewr dinya to darûn
pey çêş řezaten gyan misparûn
mirweten şîrîn şay şerbet řazan
tewaw şeş dang destey şabazan
bo zewq û şadîm to betał meker
sertapay bałam be zuxał meker
çunke şîrînî ’eyşim tał meker
perdey derûnim be zuxał meker
daxdarim ce to, bo daxim meker
gunakar xo nîm, wistaxim meker
desim damanit şîrîn gence
wesen ey şoxî, ey lar û lence
erê sosen guł, guł boy guł endam
gerden mînay saf, cemîn wêney cam
bo nazê meker zam pê taze bo
nazîç ew xasen be endaze bo
to bey ẍemze û naz ya erwam berdî
ẍemze û naz wesen, ce gyanim kerdî
to xo kêşanit ey ah serde
xestenî ce bar sengîy ey derde
mibya be ḧałim to xas bizanî
ewend misîbet penem minmanî
pey çêş? ne minîç xestey derd tom?!
dił piř ce meynet ah serd tom?!
êd ke mwaçûn, bała zeř sitûn
xîlafiş nîyen be zat bê çûn
er şîrîn ce dax şeker lêm tałen
şeker ce lay min wêney qirjałen
řasten şox wişeng zułf ’ebîrînen
key şeker ce lam çun to şîrînen?
wes ker be şeker şîrînî lêm tał
şîrînîy şeker berker ce xeyał
nemenden tabim, taqetim biřyan
zeng bed namîm ne ’ałem ziřyan
er bizurgenî wesen behane
biker ce barem lutif şahane
wext ’îş û noş badey guł řengen
ne wext de’wa û gileyî û cengen
wesen, wes derem derd ser îmşew
mibûn be zuxał ta seḧer îmşew
eger nenêrûn bo ne bot îmşew
ḧazir ker perêm yek tabût îmşew
îmşew řuxset der hey şay ermenî
sewł sîm endam kiłaf sosenî
bikerûn be şad guł geşt ce baxt
ta ke sakin bo derûn ce daxt
wer ne bîsmîlla mişûn be řawe
meḧbûb qat nîyen be řûy dinyawe
mikerûn sewday ’eşqit feramoş
ne camê henîç mey mikerûn noş
şerit bo bikerûn ew zułf ’ebîrîn
be ḧełway şeker kam wêm şîrîn
ce qînit dîsan şoxekey sermest
hem şeker namê bawerûn be dest
ce şîrînîy şehd şîrey ew şeker
ce dił tałîy to berkerûn weber
to xuda xêrit do, qiset dirazen
pîşet hîç nîyen, her ẍemze û nazen
kota ker suxen, wadey destûren
mişûn be řawe, menziłim dûren