cwab dadin şîrîn xisru ra bih naz
From the Book:
Şîrîn û Xusrew
By:
Khana Qubadi (1704-1778)
4 minutes
221 views
qemer řuḧ řuxsar xał daney bedexiş
bosa pay serîr xusrew lał bexiş
watiş: şehryar berarindey text
şay ferqed meqam daray bercîs bext
hefit îqlîm ce şem’ ḧusinit piř nûr bo
dîdey bed ce dewr dîdarit dûr bo
ta pay gaw benden ne pişt mahî
şad bî be ewreng feř bexiş şahî
pey çêş erê hey şay dara řengim
min bengim kêşan, şêtim, debengim?
şa derkarşen be fî’il neyreng
bê muftî û bê ’eqid bawerom be çeng
perê wêt amay be neçîr kerden
be ’eyş û be noş, be şerab werden
wêney ḧerîfan piř ce mekir û fend
bey tewr mikerî be şîrîn řîşxend
wenet me’lûm bo nadîrey nedîm
min bab řîşxend şa ta xundikar nîm
min ew gence nîm hez şoxê sermest
ew be serdestî bawerom we dest
min ew saḧêb qedir, ew qeydafe xûm
be şiko çun beḧir, be şewket çun kom
pose famanit min bew terze nîm
kem ’erz û sîret, hełe û herze nîm
řasen to hem şa, he şehryarî
mikerî siftem be xoş guftarî
şîrey guftarit sa çon binoşim
min xo şîrey şehd şeker firoşim
er nejnewî ḧerf ḧeqit be desten
pey çêş? şa ce şehd şeker sermesten
îse ya şyen min hoşim ce dest
to wêt mestenî hem giftugot mest
cew sebeb ḧerfim ce lay şehryar
nimebo mefhûm er waçûm sed car
werne ’urûsê çun min dyarî
bê gunat kerden bey tewr ḧesarî
erê bê însaf, bê xof û endêş
namş çêş minî, ye çêş maçan pêş
bidye bey nergis mirwarî řêzim
bey giřey derûn şołey şem bêzim
bey meygûn leban bar girtey derdim
bey dûdî boy neft henasey serdim
xofê ker ce têẍ ebroy peywestim
ce ser ney mujan dû dîdey mestim
her muyê ce zułf syam marêwen
her marê ḧełqeş ḧefî tarêwen
nîm nîgay dîdem nazk endazen
beter ce turkan mest têẍ bazen
ḧusnim çun xurşîd herçend bê perden
ne perdey ’îsmet daym perwerden
to derkaten be şîrîn řazê
biberîm ’îsmet, biderîm bazî
ne ne bew xuda neza û nemerden
ey xeyałane pûçen to kerden
er qendîl ce bêx bigêro ateş
ewsa ce cam mikerî leb çeş
ciłew horkêşe to řût ne herden
řay řast êd nîyen, řat ẍełet kerden
xusrew bo be ’îşq şîrnîy şeker
ce qezay şîrîn bêçare lader
ce nuqił û şeker to piren barit
key ḧełway şîrîn meyo be karit
min xo ce daxt, piř zûxen zamim
řeng xem girten cemîn camim
be dûren ce řesim řay dostidarî
binmanî penem to ewend xwarî
wêm kerd be serjan şahan gişt temam
axir ce lay to neyawam be kam
sa bazem cey qesir teng bê derda
pey nakamîy wêm bidem we serda
pey çêş? cey dinya çon bîm bey tare
ce text feř bexiş şahî aware
bew tewr mizanan ne pişt şebdêz
keftan, dest û pam gişt bî řêze řêz
cewanmerdî ker dest horgêre lêm
wesen, wes bey tewr řîşxend kere pêm
me’lûm bo ce lat ey kare xamen
aczay ey ḧełwa gişt natemamen
îmşew wadey wext karsazî nîyen
fesił maç û moç desbazî nîyen
wextê wextişen puxte mibo kar
ençî řezaşen şay feřřux tebar
çun baxçey beheşt lêm mibo ḧasił
xatirş cem bo negêroş ne dił