جواب دادن شیرین خسرو را به ناز
لە کتێبی:
شیرین و خوسرەو
بەرهەمی:
خانای قوبادی (1704-1778)
4 خولەک
431 بینین
قەمەر ڕوح ڕوخسار خاڵ دانەی بەدەخش
بۆسا پای سەریر خوسرەو لاڵ بەخش
واتش: شەهریار بەرارندەی تەخت
شای فەرقەد مەقام دارای بەرجیس بەخت
هەفت ئیقلیم جە شەمع حوسنت پڕ نوور بۆ
دیدەی بەد جە دەور دیدارت دوور بۆ
تا پای گاو بەندەن نە پشت ماهی
شاد بی بە ئەورەنگ فەڕ بەخش شاهی
پەی چێش ئەرێ هەی شای دارا ڕەنگم
من بەنگم کێشان، شێتم، دەبەنگم؟
شا دەرکارشەن بە فیعل نەیرەنگ
بێ موفتی و بێ عەقد باوەرۆم بە چەنگ
پەرێ وێت ئامای بە نەچیر کەردەن
بە عەیش و بە نۆش، بە شەراب وەردەن
وێنەی حەریفان پڕ جە مەکر و فەند
بەی تەور مکەری بە شیرین ڕیشخەند
وەنەت مەعلووم بۆ نادیرەی نەدیم
من باب ڕیشخەند شا تا خوندکار نیم
من ئەو گەنجە نیم هەز شۆخێ سەرمەست
ئەو بە سەردەستی باوەرۆم وە دەست
من ئەو ساحێب قەدر، ئەو قەیدافە خووم
بە شکۆ چون بەحر، بە شەوکەت چون کۆم
پۆسە فامانت من بەو تەرزە نیم
کەم عەرز و سیرەت، هەڵە و هەرزە نیم
ڕاسەن تۆ هەم شا، هە شەهریاری
مکەری سفتەم بە خۆش گوفتاری
شیرەی گوفتارت سا چۆن بنۆشم
من خۆ شیرەی شەهد شەکەر فرۆشم
ئەر نەژنەوی حەرف حەقت بە دەستەن
پەی چێش؟ شا جە شەهد شەکەر سەرمەستەن
ئیسە یا شیەن من هۆشم جە دەست
تۆ وێت مەستەنی هەم گفتوگۆت مەست
جەو سەبەب حەرفم جە لای شەهریار
نمەبۆ مەفهووم ئەر واچووم سەد جار
وەرنە عورووسێ چون من دیاری
بێ گونات کەردەن بەی تەور حەساری
ئەرێ بێ ئینساف، بێ خۆف و ئەندێش
نامش چێش منی، یە چێش ماچان پێش
بدیە بەی نەرگس مرواری ڕێزم
بەی گڕەی دەروون شۆڵەی شەم بێزم
بەی مەیگوون لەبان بار گرتەی دەردم
بەی دوودی بۆی نەفت هەناسەی سەردم
خۆفێ کەر جە تێغ ئەبرۆی پەیوەستم
جە سەر نەی موژان دوو دیدەی مەستم
هەر مویێ جە زوڵف سیام مارێوەن
هەر مارێ حەڵقەش حەفی تارێوەن
نیم نیگای دیدەم نازک ئەندازەن
بەتەر جە تورکان مەست تێغ بازەن
حوسنم چون خورشید هەرچەند بێ پەردەن
نە پەردەی عیسمەت دایم پەروەردەن
تۆ دەرکاتەن بە شیرین ڕازێ
ببەریم عیسمەت، بدەریم بازی
نە نە بەو خودا نەزا و نەمەردەن
ئەی خەیاڵانە پووچەن تۆ کەردەن
ئەر قەندیل جە بێخ بگێرۆ ئاتەش
ئەوسا جە جام مکەری لەب چەش
جڵەو هۆرکێشە تۆ ڕووت نە هەردەن
ڕای ڕاست ئێد نییەن، ڕات غەڵەت کەردەن
خوسرەو بۆ بە عیشق شیرنیی شەکەر
جە قەزای شیرین بێچارە لادەر
جە نوقڵ و شەکەر تۆ پرەن بارت
کەی حەڵوای شیرین مەیۆ بە کارت
من خۆ جە داخت، پڕ زووخەن زامم
ڕەنگ خەم گرتەن جەمین جامم
بە دوورەن جە ڕەسم ڕای دۆستداری
بنمانی پەنەم تۆ ئەوەند خواری
وێم کەرد بە سەرژان شاهان گشت تەمام
ئاخر جە لای تۆ نەیاوام بە کام
سا بازەم جەی قەسر تەنگ بێ دەردا
پەی ناکامیی وێم بدەم وە سەردا
پەی چێش؟ جەی دنیا چۆن بیم بەی تارە
جە تەخت فەڕ بەخش شاهی ئاوارە
بەو تەور مزانان نە پشت شەبدێز
کەفتان، دەست و پام گشت بی ڕێزە ڕێز
جەوانمەردی کەر دەست هۆرگێرە لێم
وەسەن، وەس بەی تەور ڕیشخەند کەرە پێم
مەعلووم بۆ جە لات ئەی کارە خامەن
ئاجزای ئەی حەڵوا گشت ناتەمامەن
ئیمشەو وادەی وەخت کارسازی نییەن
فەسڵ ماچ و مۆچ دەسبازی نییەن
وەختێ وەختشەن پوختە مبۆ کار
ئەنچی ڕەزاشەن شای فەڕڕوخ تەبار
چون باخچەی بەهەشت لێم مبۆ حاسڵ
خاترش جەم بۆ نەگێرۆش نە دڵ