نامه نوشتن خسرو به شیرین از مرگ فرهاد کوهکن و پشیمان شدن از کار خودش
از کتاب:
شیرین و خوسرەو
اثر:
خانای قبادی (1704-1778)
4 دقیقه
490 مشاهده
خوسرەو ئێد شنەفت کێشا ئاهـ سەرد
پەی بەدکاریی وێش پەشیمانی بەرد
دەمێ کەردش فکر، ئاخر وات بە وێش
بەدکار عاقیبەت بەد مەیۆ نە ڕێش
غەرەز سوبح و شام ئەو شای جەم نگین
پەی مەرگ فەرهاد بزورگ زادەی چین
نە ڕووی شانشین ئەعلای عەنبەرین
ئاشفتەتەر بی جە زوڵف شیرین
بەی پەژارەوە ئەو پەروین پایە
ئەو کەیخوسرەو بەزم سکەندەر سایە
تەڵەب کەرد کاتب دانای پڕ هۆشێ
مونشیی خەت شیرین، گەوهەر فرۆشێ
فەرما هەی کاتب دوڕ سەنج دێرین
بنویس بە شیرین مەکتووبێ شیرین
ئەووەڵ سەر سەفحەی ئەو نامەی دڵبەند
مەنقووش کەر بە نام زات خوداوەند
ئاحر وەلای ئەو باڵا زەڕ ستوون
ئینشا کەر چەند حەرف چون دوڕڕ مەکنوون
کاتب «حسب الامرعربی» ئەو خورشید ئەفسەر
جەولاندا بەی تەور خامەی بۆ عەنبەر
ئەی نامە بە نم مەعبوود بێ عەیب
غەنی جە هەر وەسف، ئاگا جە هەر غەیب
ڕەوشەن ساز عەین ئەرباب بینش
باعیس ئیجاد گشت ئافەرینش
نەخشبەند چەرخ بێ خامە و بێ ڕەنگ
ئافەرینندەی دانەی لاڵ جە سەنگ
حەیی بێ شەریک «لا احصىٰعربی» سیفات
گیان بەخش و گیان کێش کاففەی مەخلووقات
جە بەعد ئەی حەمد شیرین تەر جە قەند
کاتب خامە کەرد بەیتەور شەکەر خەند
ئارۆ ئەی خەبەر یاوا بەی وەتەن
شیرین شەم شەوق شازادەی ئەرمەن
پەی مەرگ فەرهاد نە پای بێستوون
نوختەی ماوی خاڵ کەندەن بە ناخوون
جە ئەندۆی دەروون بە شەو تا بە ڕۆ
چون بۆ مەردەگان کۆگای خەم وەکۆ
دیدەش کە نەرگس شەهلا مبێزۆ
بە ڕووی سەمەندا سیما مڕێزۆ
یەخەی بۆ عەنبەر موشکین جامەی وێش
تا نە پای لیمۆی بۆ شەمامەی وێش
کەردەنش سەد چاک وێنەی غونچەی گوڵ
ئاوەردەن جە بێخ تاتا جە سونبوڵ
بە نەسرین کەردەن بەرگ گوڵ زامدار
شکفتەن نە ڕووی ئەو گوڵ لالەزار
عەرەق چین چەنی شەوبەند زەڕتار
وستەن نە ڕووی خاک سیای سەنگ خار
شاخ سەهی سەرو قامەتش جە خەم
چون چەمەی چەوگان بازی بەستەن چەم
پەرێ حەماڵێ کۆهـ ئەفکەن بەی تەور
ئەسرش بە تاوەن چون سێڵاو هەور
ڕۆ چون بوڵبوڵەن نەغمەی ناڵینش
شەو بەرق شەوق ئاهـ شەمع باڵینش
بە جای جام مەی جورعەی زووخ نۆشەن
چون سیلسیلەی زوڵف وێش سیاهـ پۆشەن
ئافەرین شیرین عەجەب هاڵ زانی
چەنی یار وێت خاس میهرەبانی
سەد ڕەحمەت بە شەرت وەفا و بەین تۆ
یارێ کە یار بۆ هەی بەی تەور مبۆ
پەی چێش؛ عەنبەر بۆی زوڵفان عەبیرین
شای شەکەر ڕزان غەمزە و ناز شیرین
وەفا و شەرت و بەین شیرین ئەرمەن
هەر پاسەن کەردی تۆ چەنی کۆکەن
بەڵێ هەی بە ڕام، دڵ جە سەنگ خار
مبیا جە ئەووەڵ بە غەمزەی خوونخوار
نە پای بێستوون نەکوشتات جە داخ
سا کوشتت پەی چێش مبی بێ دەماخ؟
ئەر نەکێشیش خەم فرێ بێ دەردی
هەرچی پێش کریا هەر تۆ پێش کەردی
ئەکەر تا سەد ساڵ بگێڵی پەیوەست
جەو خاکی تەرێ نمەگنۆت وە دەست
بە ڕاست چون فەرهاد بە شەرت دروستێ
پەیدا نمەبۆ شیرین پەرستێ
بەڵێ سا شیرین جە دمای مەردەن
جە کەڵ مگێرۆ زاری و شین کەردەن؟
وەختێ تەقدیرێ جە سەر بی نازڵ
بە زاری و بە شین نمەبۆ باتڵ
دەستوورەن نە دەور ئەی دنیای نامەرد
نە عەرسەی دەوران هەرچی زاد و مەرد
ئەر سەد ساڵ، ئەگەر ڕۆیێ ممانی
بەرمشق ئاخر جەی دنیای فانی
خاتر شاد بکەر، مەنیشە دڵ تەنگ
پەی تۆ جەی دنیا فرێن فەرهاد ڕەنگ
جەی دەور دنیای پڕ جە مەلامەت
ئەگەر فەرهاد شی، شیرین سڵامەت
وەختێ کە کاتب بە خامەی موشکین
بەی تەور ڕەقەم کەرد ئەی نامەی ڕەنگین
شەهەنشا فەرما پەیکێ ئاوەردن
سەر بە مۆرش کەرد، پەنەش سپەردن
ئەو پەیک بۆسا پای سەریر خوسرەو
پەی شیرین بە قەسر نامەش بەرد بە دەو
سا کە دیش شیرین نامەی شەهریار
سوجدەش بەرد، بۆسا بەڵکە دووسەد جار
چون نەسیم غونجەی نەوخێز ساوا
ئەو گوڵ چیهرەی شۆخ نامەش شکاوا
چون مونشیی خۆش لەفز دەبیر دانا
هەر جە مەتڵەعەش تا مەقتەع زانا
فاما کە خوسرەو بێ دەماخ لێشەن
مەزموون نامەش گشت نۆش و نێشەن
زەهر کوشندەی حەفیی زام خەتەر
ئامێتە کەردەن بە شیر و شەکەر
ئەجزای حەرف و سەوت ئەی نامەی دڵبەند
هێچ نەبی سیوای حەنزەل چەنی قەند
شیرین جەو نامەی بۆ عەبیرینە
جەواب شیرەی ترش و شیرینە
نە سەبر نە تاقەت چەم لێش بپۆشۆ
نە جایێ بە توند چەنەش بخرۆشۆ
بە سەختی و بە ڕەنج ئەو بە خاتر ڕێش
مویارا هەر ڕۆ ڕۆزگار وێش