namh nuştin xisru bih şîrîn az mirg firhad kuhkin û pişîman şidin az kar xudiş
Li pirtûka:
Şîrîn û Xusrew
Berhema:
Xanayê Qubadî (1704-1778)
4 Xulek
489 Dîtin
xusrew êd şineft kêşa ah serd
pey bedkarîy wêş peşîmanî berd
demê kerdiş fikir, axir wat be wêş
bedkar ’aqîbet bed meyo ne řêş
ẍerez subiḧ û şam ew şay cem nigîn
pey merg ferhad bizurg zadey çîn
ne řûy şanşîn e’lay ’enberîn
aşfiteter bî ce zułf şîrîn
bey pejarewe ew perwîn paye
ew keyxusrew bezim sikender saye
tełeb kerd katib danay piř hoşê
munşîy xet şîrîn, gewher firoşê
ferma hey katib duř senc dêrîn
binwîs be şîrîn mektûbê şîrîn
ewweł ser sefḧey ew namey diłbend
menqûş ker be nam zat xudawend
aḧir welay ew bała zeř sitûn
înşa ker çend ḧerf çun duřiř meknûn
katib «ḧisb alamirErebî» ew xurşîd efser
cewlanda bey tewr xamey bo ’enber
ey name be nim me’bûd bê ’eyb
ẍenî ce her wesif, aga ce her ẍeyb
řewşen saz ’eyn erbab bînş
ba’îs îcad gişt aferînş
nexşibend çerx bê xame û bê řeng
aferînnidey daney lał ce seng
ḧeyî bê şerîk «la aḧsîٰErebî» sîfat
gyan bexiş û gyan kêş kaffey mexlûqat
ce be’d ey ḧemd şîrîn ter ce qend
katib xame kerd beytewr şeker xend
aro ey xeber yawa bey weten
şîrîn şem şewq şazadey ermen
pey merg ferhad ne pay bêstûn
nuxtey mawî xał kenden be naxûn
ce endoy derûn be şew ta be řo
çun bo merdegan kogay xem weko
dîdeş ke nergis şehla mibêzo
be řûy semenda sîma miřêzo
yexey bo ’enber muşkîn camey wêş
ta ne pay lîmoy bo şemamey wêş
kerdenş sed çak wêney ẍunçey guł
awerden ce bêx tata ce sunbuł
be nesrîn kerden berg guł zamdar
şikfiten ne řûy ew guł lalezar
’ereq çîn çenî şewbend zeřtar
wisten ne řûy xak syay seng xar
şax sehî seru qametiş ce xem
çun çemey çewgan bazî besten çem
perê ḧemałê koh efken bey tewr
esirş be tawen çun sêław hewr
řo çun bułbułen neẍmey nałînş
şew berq şewq ah şem’ bałînş
be cay cam mey cur’ey zûx noşen
çun sîlsîley zułf wêş syah poşen
aferîn şîrîn ’eceb hał zanî
çenî yar wêt xas mîhrebanî
sed řeḧmet be şerit wefa û beyn to
yarê ke yar bo hey bey tewr mibo
pey çêş; ’enber boy zułfan ’ebîrîn
şay şeker řizan ẍemze û naz şîrîn
wefa û şerit û beyn şîrîn ermen
her pasen kerdî to çenî koken
bełê hey be řam, dił ce seng xar
mibya ce ewweł be ẍemzey xûnxiwar
ne pay bêstûn nekuştat ce dax
sa kuştit pey çêş mibî bê demax?
er nekêşîş xem firê bê derdî
herçî pêş kirya her to pêş kerdî
eker ta sed sał bigêłî peywest
cew xakî terê nimegnot we dest
be řast çun ferhad be şerit dirustê
peyda nimebo şîrîn peristê
bełê sa şîrîn ce dimay merden
ce keł migêro zarî û şîn kerden?
wextê teqdîrê ce ser bî naził
be zarî û be şîn nimebo batił
destûren ne dewr ey dinyay namerd
ne ’ersey dewran herçî zad û merd
er sed sał, eger řoyê mimanî
berimişq axir cey dinyay fanî
xatir şad biker, menîşe dił teng
pey to cey dinya firên ferhad řeng
cey dewr dinyay piř ce melamet
eger ferhad şî, şîrîn siłamet
wextê ke katib be xamey muşkîn
bey tewr řeqem kerd ey namey řengîn
şehenşa ferma peykê awerdin
ser be morş kerd, peneş siperdin
ew peyk bosa pay serîr xusrew
pey şîrîn be qesir nameş berd be dew
sa ke dîş şîrîn namey şehryar
sucdeş berd, bosa bełke dûsed car
çun nesîm ẍuncey newxêz sawa
ew guł çîhrey şox nameş şikawa
çun munşîy xoş lefiz debîr dana
her ce metłe’eş ta meqte’ zana
fama ke xusrew bê demax lêşen
mezmûn nameş gişt noş û nêşen
zehir kuşnidey ḧefîy zam xeter
amête kerden be şîr û şeker
eczay ḧerf û sewt ey namey diłbend
hêç nebî sîway ḧenzel çenî qend
şîrîn cew namey bo ’ebîrîne
cewab şîrey tirş û şîrîne
ne sebir ne taqet çem lêş bipoşo
ne cayê be tund çeneş bixroşo
be sextî û be řenc ew be xatir řêş
muyara her řo řozgar wêş