در صفت عاشق شدن فرهاد کوه‌کن به شیرین ارمن و حالات او
از کتاب:
شیرین و خوسرەو
اثر:
خانای قبادی (1704-1778)
2 دقیقه
454 مشاهده
ئینشا بەند شەرح شیرین ئەرمەن
بەی تەور کەرد ئینشای حاڵات کۆکەن
چون داڵ پەڕ خەدەنگ ئەو شای پەریزاد
پەڕان تا پەڕ نیشت نە جەرگ فەرهاد
فەقیر جە ئێشش بە ڕۆ تا بە شەو
مناڵا چون نای زەڕڕین خوسرەو
جەو دەشت چۆڵدا مگێڵا ڕەنجوور
جە یاران مەحرووم، جە دۆستان دوور
خاو و خورد چون دوود گووگرد ئەحمەر
نایاب بی جە لاش هەر شەو تا سەحەر
نە کەسێ مەحرەم بزانۆ حاڵش
ئاوێ بشانۆ بە کۆی زوخاڵش
نە هەمڕازێ بی حاڵزان دڵ بۆ
قەدیم دەردەوار دانا و عاقڵ بۆ
ساتێ چون شاپوور کەم شەرت دێرین
ساتێ بکەرۆش بە ڕاز شیرین
نەو چۆڵدا نە یار، نە غەمخوارش بی
نە تاقەت، نە سەبر، نە قەرارش بی
گاگا مکێشا گەرد پای شیرین
نە چەم چون سورمەی سیای عەنبەرین
مبۆسا گا خار، گاگا کەرد ڕاش
گا قەسرش مدی گیان مکەرد فیداش
ڕەم ڕەم جە ئاهوو، جە گەوەزن و گۆر
جە مورغ باڵدار، جە شێر پڕ زۆر
شەوان مگرتن دەور بالینش
گۆش مدان بە ساز سەدای ناڵینش
بەی تەور بێ هۆش بی، بێ نەوا و دڵ تەنگ
بنیشتاش نە چەم ئەر نەی چون خەدەنگ
هیچ نمەزاناش نە ڕووی عەرسەی دەور
نیشتەن نە دیدەش خەدەنگێ بەی تەور
ئەر ڕوێ سەد جار ڕووش مبی زامدار
نمەگێڵنا ڕوو یە سەنگەن یا خار
وەختێ چون سەرعی نە جا مەخێزا
بە هەر تەرەفدا چون باد مگورێزا
وێڵ تەر جە مەجنوون ئەرا گێڵ وێڵ بی
جە سوب تا بە شام نە گەشت و گێڵ بی
ئەر گاهێ بە شاد ئەو خەستەی لێوە
ماما بە خزمەت ئەو شیرین شێوە
هەرچەند مگڕیا دەروونش جە شەوق
مگرتش ئارام دەمێ هەم بە زەوق
باز هەم جە هیجران ئەو زوڵف بۆ عەنبەر
چون وەحشی ڕای چۆڵ مگرتش وەبەر
شەو شەوێ ماما چون باد شەبگیر
منۆشا جە حەوز شیرین جامێ شیر
فێشتەر جەو دەمدا فەرهاد دێرین
مدارا مکەرد بەو شیر شیرین
چون پارچەی پەڕگار نەققاش ئەڕژەنگ
شەو نە دەور حەوز دەور مدا دڵتەنگ
ئاخر نە ئافاق سەدای عەشق ئەو
بەرز بی چو خورۆش کووس کەیخوسرەو