dir sifit ’aşiq şidin firhad kwekin bih şîrîn armin û ḧalat aw
From the Book:
Şîrîn û Xusrew
By:
Khana Qubadi (1704-1778)
2 minutes
456 views
înşa bend şerḧ şîrîn ermen
bey tewr kerd înşay ḧałat koken
çun dał peř xedeng ew şay perîzad
peřan ta peř nîşt ne cerg ferhad
feqîr ce êşiş be řo ta be şew
minała çun nay zeřřîn xusrew
cew deşt çołda migêła řencûr
ce yaran meḧrûm, ce dostan dûr
xaw û xurd çun dûd gûgird eḧmer
nayab bî ce laş her şew ta seḧer
ne kesê meḧrem bizano ḧałş
awê bişano be koy zuxałş
ne hemřazê bî ḧałzan dił bo
qedîm derdewar dana û ’aqił bo
satê çun şapûr kem şerit dêrîn
satê bikeroş be řaz şîrîn
new çołda ne yar, ne ẍemxiwarş bî
ne taqet, ne sebir, ne qerarş bî
gaga mikêşa gerd pay şîrîn
ne çem çun surmey syay ’enberîn
mibosa ga xar, gaga kerd řaş
ga qesirş midî gyan mikerd fîdaş
řem řem ce ahû, ce gewezin û gor
ce murẍ bałdar, ce şêr piř zor
şewan migirtin dewr balînş
goş midan be saz seday nałînş
bey tewr bê hoş bî, bê newa û dił teng
binîştaş ne çem er ney çun xedeng
hîç nimezanaş ne řûy ’ersey dewr
nîşten ne dîdeş xedengê bey tewr
er řwê sed car řûş mibî zamdar
nimegêłna řû ye sengen ya xar
wextê çun ser’î ne ca mexêza
be her terefda çun bad migurêza
wêł ter ce mecnûn era gêł wêł bî
ce sub ta be şam ne geşt û gêł bî
er gahê be şad ew xestey lêwe
mama be xizmet ew şîrîn şêwe
herçend migřya derûnş ce şewq
migirtiş aram demê hem be zewq
baz hem ce hîcran ew zułf bo ’enber
çun weḧşî řay çoł migirtiş weber
şew şewê mama çun bad şebgîr
minoşa ce ḧewz şîrîn camê şîr
fêşter cew demda ferhad dêrîn
midara mikerd bew şîr şîrîn
çun parçey peřgar neqqaş eřjeng
şew ne dewr ḧewz dewr mida diłteng
axir ne afaq seday ’eşq ew
berz bî çu xuroş kûs keyxusrew