saxtin firhad cwî sing bih cihit şîrîn
From the Book:
Şîrîn û Xusrew
By:
Khana Qubadi (1704-1778)
2 minutes
490 views
şerbetdar şox ey şerbet xane
perê bizurgan dewr zemane
ce řay ’eqił û fam danay hunerwer
bey tewr memzûc kerd şîr çenî şeker
çun xas cew ferman aga bî ferhad
ba çabukî kerd şurû’ bew bunyad
her ce ser be berg kêşa be ferheng
dîwarê çun sed sikender ce seng
çend tawe ce seng sipî çun meřmeř
taşa ba têşey połay deste zeř
ce bałay dîwar ew tawe dêrîn
berd ne yek dirust ta qesir şîrîn
be ’erz mangê ferhad serşar
dû firsexî kerd tertîb ey kar
aferîn ferhad çopan sara
pey şîrîn çun ḧûr ’enberçe dara
be têşey folad çun «yum alḧişirArabic»
aşkara kerd coy şîr û şeker
cewdima hem best ḧewz ’ebîrîn
çun çeşmey řeḧîq jey şîr şîrîn
sa wextê ey kar be îtmam yawa
şîrîn ce zewqiş çun guł şikawa
ḧeyran bê yeksan ce seng taşîy ew
c dest û peřgar, ce neqqaşîy ew
ce zor bahûy tehemtenîy ew
ce têşey folad yeksed menîy ew
ce şan û şewket şehryarîy ew
ce tewr terkîb şîrîn karîy ew
ce sewł qamet newřesîdey ew
ce şoxîy gerdiş çerx dîdey ew
şay şîrîn řazan şox nafe yer
fermaş awerdin mesnedê ce zeř
şahane destûr nîşana ferhad
ne bałay mesned zeřřîn be dił şad
tawis řengîn guł baẍçey şahî
sehî seru şox řiştey îlahî
camê ce yaqût piř ce mey guł řeng
daş, noşa ferhad wêł xatir teng
perê dest muzdiş çend dane gewher
ce goşwarey goş berawerd weber
bexşa be ferhad ustad dêrîn
aferîn şîrîn, zułf û xał şîrîn
bełê ew gewher ferhad piř xem
horş girt bosa der sat û der dem
şana we pay text şîrîn dara
aşfite û bed ḧał řû kerd ne sara