ساختن فرهاد جوی سنگ به جهت شیرین
لە کتێبی:
شیرین و خوسرەو
بەرهەمی:
خانای قوبادی (1704-1778)
2 خولەک
488 بینین
شەربەتدار شۆخ ئەی شەربەت خانە
پەرێ بزورگان دەور زەمانە
جە ڕای عەقڵ و فام دانای هونەروەر
بەی تەور مەمزووج کەرد شیر چەنی شەکەر
چون خاس جەو فەرمان ئاگا بی فەرهاد
با چابوکی کەرد شورووع بەو بونیاد
هەر جە سەر بە بەرگ کێشا بە فەرهەنگ
دیوارێ چون سەد سکەندەر جە سەنگ
چەند تاوە جە سەنگ سپی چون مەڕمەڕ
تاشا با تێشەی پۆڵای دەستە زەڕ
جە باڵای دیوار ئەو تاوە دێرین
بەرد نە یەک دروست تا قەسر شیرین
بە عەرز مانگێ فەرهاد سەرشار
دوو فرسەخی کەرد تەرتیب ئەی کار
ئافەرین فەرهاد چۆپان سارا
پەی شیرین چون حوور عەنبەرچە دارا
بە تێشەی فۆلاد چون «يوم الحشرعەرەبی»
ئاشکارا کەرد جۆی شیر و شەکەر
جەودما هەم بەست حەوز عەبیرین
چون چەشمەی ڕەحیق ژەی شیر شیرین
سا وەختێ ئەی کار بە ئیتمام یاوا
شیرین جە زەوقش چون گوڵ شکاوا
حەیران بێ یەکسان جە سەنگ تاشیی ئەو
ج دەست و پەڕگار، جە نەققاشیی ئەو
جە زۆر باهووی تەهەمتەنیی ئەو
جە تێشەی فۆلاد یەکسەد مەنیی ئەو
جە شان و شەوکەت شەهریاریی ئەو
جە تەور تەرکیب شیرین کاریی ئەو
جە سەوڵ قامەت نەوڕەسیدەی ئەو
جە شۆخیی گەردش چەرخ دیدەی ئەو
شای شیرین ڕازان شۆخ نافە یەر
فەرماش ئاوەردن مەسنەدێ جە زەڕ
شاهانە دەستوور نیشانا فەرهاد
نە باڵای مەسنەد زەڕڕین بە دڵ شاد
تاوس ڕەنگین گوڵ باغچەی شاهی
سەهی سەرو شۆخ ڕشتەی ئیلاهی
جامێ جە یاقووت پڕ جە مەی گوڵ ڕەنگ
داش، نۆشا فەرهاد وێڵ خاتر تەنگ
پەرێ دەست موزدش چەند دانە گەوهەر
جە گۆشوارەی گۆش بەراوەرد وەبەر
بەخشا بە فەرهاد ئوستاد دێرین
ئافەرین شیرین، زوڵف و خاڵ شیرین
بەڵێ ئەو گەوهەر فەرهاد پڕ خەم
هۆرش گرت بۆسا دەر سات و دەر دەم
شانا وە پای تەخت شیرین دارا
ئاشفتە و بەد حاڵ ڕوو کەرد نە سارا