رفتن شاپور به‌عقب فرهاد و آوردن او را به نزد شیرین ارمن
لە کتێبی:
شیرین و خوسرەو
بەرهەمی:
خانای قوبادی (1704-1778)
4 خولەک
487 بینین
چون عەرووس ڕۆ جە بەند شەو ڕەست
ئاینەی ڕەخشان خورشید گرت بە دەست
شاپوور بە ڕوخسەت ئەو شای پەریزاد
هۆرێزا بە جەخت، پەیدا کەرد فەرهاد
خۆ بەو تەور زانا فەرهاد بێ دڵ
نە دەوران مبۆ مرادش حاسڵ
نەزاناش گەردوون دوور جە ڕای بەینەت
ئاراستەش کەردەن پەی سزا و مەینەت
ئاخر شاپوور وات نەرمێ بە کۆکەن
زەروورەن بە تۆ شازادەی ئەرمەن
چەنی قوڵنگە و تێشەی سەنگ تاشیت
گۆنیا و تەناف ڕەنگ نەققاشیت
بشیم وە پای تەخت خورشید سایەی ئەو
بارگەی فەرقەد قەدر، پەروین پایەی ئەو
فەرهاد «حسب الامرعەرەبی» شاپوور نەخش بەند
هۆرێزا چون سەرو سەهی دڵ پەسەند
چەنی شاپوور شی سوبوکتەر جە باد
وە پای زەڕڕین تەخت شیرین ب دڵ شاد
مدرا وە پای تەخت ئەعلای خوسرەوی
بە تەن وێنە ییل، بە بازوو قەوی
بە شکۆ چون شا، بە شەوکەت چون شێر
بە بەرگ چون بەور دڕوندەی دلێر
با قامەت چون شاخ نەوخێز عەرعەر
با ڕوح چون خورشید ڕەخشندەی خاوەر
جەناب عولیای مەریەم ئاستین
شای شەکەر ڕازان ڕۆم و هیند و چین
فەرماش تا پەرێ فەرهاد سەنگ بۆ
نیاشا کورسی تیە نیشان دوڕ
نە پشت پەردەی شیرین ئەرمەن
نە باڵای کورسی نیشت چون تەهەمتەن
پەری پەیکەر سام جە پشت پەردەوە
غونچەی لەب چون گوڵ وڵاو کەردەوە
پەی شەکەر ڕێزی ئەو شۆخ دڵبەر
هۆرداشت جە یاقووت دوو قوفڵ گەوهەر
بە چەند گریشمە و چەند غەمزە و چەند ناز
چون نەغمەی بوڵبوڵ ئاما بە ئاواز
شنەفتم جە لەفز ئوستاد دێرین
جەو بۆن مواتن بە شیرین، شەیرین
چون حەڵوای شەکەر شیرین بی ڕازش
ئاهـ بکەر نە دەم شۆخیی ئاوازش
هەر کەس ئاوازش بشنەفتا بە گۆش
ئەر ئەفلاتوون بۆ، ئەو مشی جە هۆش
«الحُكم للهعەرەبی» جە ڕێزەی ڕازش
«نَعوذ بِاللهعەرەبی» جە غەمزە و نازش
وەختێ بە فەرهاد بێچارەی کۆکەن
یاوا ڕێزەی ڕاز شیرین ئەرمەن
کێشا نە دەروون ئاهـ ستەمناک
دەر سات چون مەسرووع خڵتیا نە خاک
کەفت نە ڕووی زەمین بە وێنەی زامدار
پێچیا و پێچ وەرد چون کڵافەی مار
شیرین شەش دانگ زوڵف دەستە زەنجیر
مەمان شەمامەی وەشبۆی بۆ عەبیر
زانا کە فەرهاد جە ڕێزەی ڕازش
بە مەحز شۆخیی نەغمەی ئاوازش
بێخود خڵتیا نە خاک سارا
سودای تیر عەشق جەلاش ویارا
خەیلێ خەیاڵ کەرد جە بێ قەراریش
بە ڕەنگێ هەنی کەردش دڵداریش
ئیمجار وات بشنەو هەی مەرد ئوستاد
بۆ جە ڕای دۆستی خاترم کەر شاد
ئەنچیت زەروورەن من مدەرووم پێت
بە چابوک دەستیی ئوستاد کاریی وێت
نەوعێ کەر بەیۆ، ئوستاد دێرین
شیر بە وێش دایم بە قەسر شیرین
پەی چێش کە دایم شیرم زەروورەن
کەللە دوو فرسەخ جە قەسرم دوورەن
مبۆ جەی ئەمرە نەوی خاتر تەنگ
پەی من بکێشی تۆ جۆیێ نە سەنگ
وەختێ بدۆشان گەللە بە دەوان
نەو جۆدا زەریف شیر ببۆ ڕەوان
تا جە یومن تۆ بە بێ دەردی سەر
بنۆشم ئەو شیر خۆش چەنی شەکەر
جەی ڕز شیرین شیرین ئەرمەن
مەدهۆش بی یەکسان فەرهاد کۆکەن
غەرەز ئەو میسکین بێچارەی دڵ ڕێش
جە عەشق شیرین کارێ ئاما پێش
چمان کە جە دوور مشنەفت ئاوازش
هیچ نمەفاما مەفهووم ڕازش
ئەمما پەی خاتر ئەو بەرگوزیدە
ئەنگوشتش نیا وە بان دیدە
دەر دەم دەر ساعەت هۆرێزا جە لاش
هۆرگرت قوڵنگە و تێشەی سەنگ تراش
دیسان هەم پەرساش جە پەرستاران
واتش من مەستم بەش خودا یاران
چێش فەرما شیرین نیم بە فام وێم
بکەردێ جە نۆ خاتر نیشان پێم
پەرێش ئەو یاران زوڵف بۆ عەبیرین
کەردشان جە نۆ فەرموودەی شیرین