پاسخ دادن خسرو شیرین را
از کتاب:
شیرین و خوسرەو
اثر:
خانای قبادی (1704-1778)
3 دقیقه
274 مشاهده
دیسان هەم جەناب شای سەنعانی مەشق
کیشوەر گوشای موڵک پڕ جە شۆر و عەشق
بڕیاش نە دڵ سەبر، نە دەروون ئارام
بە گوستاخی وات ئەرێ گوڵ ئەندام
یەن جە باب من دەروونت ڕێشەن
گوروفت و گیریت نمەز جە چێشەن
یە من پەرێ تۆ هامڕاز دەردم
جە تاج و جە تەخت شاهی ویەردم
بەستم ببە ڕشتەی سسەودای عیشقت پشت
وێم کەرد بە سەر ژان پادشاهان گشت
ئەر پەی تۆ نەبۆ نادیرەی نەدیم
چێگە چ کارم، ئەرمەنی خۆ نیم
مەعلووم بۆ جە لات من پا بەست تۆم
پێکیای خەدەنگ موژەی شەست تۆم
وەرنە من جە کۆ شای شیرین سوخەن
ئەی دەرگێڵیە نە ئۆلگەی ئەرمەن
بەڵا سەمەن بۆی شۆخ سیم ئەندام
قامەت زەڕستوون جەمین وێنەی جام
حەرفێ مواچوون جە ڕای گوستاخی
بە شەرتێ نەبۆ وە بێ دەماخی
یە چ ڕەمزێوەن چون کەیان کەی
جە وەخت مەستی و ناڵەی ساز نەی
مدەی پێم شەربەت جە بۆسەی قەندت
جە غونچەی لەبان شیرین ڕەندت
وەخت هوشیاری بە گفتوگۆتەن
یە خیشم و غەزەب، یە تان و پۆتەن
ئەری نەرگس بۆی نەزاکەت شیرین
کڵاف سۆسەنی، زوڵفان عەنبەرین
مەر هەرکەس چون تۆ نازک ناز مبۆ
بێ شەرت و بێ شۆن، بێ مەجاز مبۆ
ئەر دڵ جە سەنگ نیت، شۆخ ستەمگەر
ئیمشەو تا بە ڕۆ بۆ پەشتانم بەر
وەر نە من تاقەت نەداروون ئیمشەو
ئەر گیان هەزار بۆ مسپاروون ئیمشەو
با پەشتانت بوون، ئیمانم ئیمشەو
غەمخواریم بکەر میهمانم ئیمشەو
جە عەشقت چون شەمع گریانم ئیمشەو
بۆی قرچەم بشنەو، بوریانم ئیمشەو
ئەر مدەی جە وەسڵ من وایەم ئیمشەو
مویەرۆ جە عەرش من پایەم ئیمشەو
ئەر نەدەی، قیبڵەم، ئیمشەو مرادم
نەکەری جە دەست مەینەت ئازادم
ئەروام نەمەندەن سەوڵ دڵپەسەند
ئەروام مسپاروون بە گیانت سەوگەند
فیدات بام وەسەن وەس ئازارم دەو
وەس بە غەمزەی شۆخ یەکسان خوارم کەر
چێش مدەی جواب فەڕر زێبا و زوشت
بواچان شیرین پادشاهێش کوشت
ئیمشەو جە ڕای لوتف ئەر بکێشیم ناز
با جە پا بۆست ببوون سەر ئەفراز
ئەر لوتفت نیەن تۆ جە دەرووندا
ڕوخسەت دەر پەی وێم بشوون وە تووندا
سەهی سەرو قامەت، کڵاف سۆسەنی
شازادەی بزورگ موڵک ئەرمەنی
کەمەند زوڵفت کەردەن زنجیرم
نام وێم چون قەیس بەردەن جە ویرم
ئامانەن ئیمشەو چون زوڵف لوولت
با ببوون پەشتان باڵای نەوتووڵت
بۆ بنیەو نە بۆی ساف عەبیرینت
بنۆشوون شیرەی قەند شیرینت
وەر نە بەو خودا زوڵف بۆ عەبیرین
مسپاروون بە تاڵ من گیان شیرین