pasix dadin xisru şîrîn ra
From the Book:
Şîrîn û Xusrew
By:
Khana Qubadi (1704-1778)
3 minutes
316 views
dîsan hem cenab şay sen’anî meşq
kîşwer guşay mułk piř ce şor û ’eşq
biřyaş ne dił sebir, ne derûn aram
be gustaxî wat erê guł endam
yen ce bab min derûnit řêşen
gurufit û gîrît nimez ce çêşen
ye min perê to hamřaz derdim
ce tac û ce text şahî wiyerdim
bestim bibe řiştey sisewday ’îşqit pişt
wêm kerd be ser jan padşahan gişt
er pey to nebo nadîrey nedîm
çêge çi karim, ermenî xo nîm
me’lûm bo ce lat min pa best tom
pêkyay xedeng mujey şest tom
werne min ce ko şay şîrîn suxen
ey dergêłye ne olgey ermen
beła semen boy şox sîm endam
qamet zeřistûn cemîn wêney cam
ḧerfê mwaçûn ce řay gustaxî
be şertê nebo we bê demaxî
ye çi řemzêwen çun keyan key
ce wext mestî û nałey saz ney
midey pêm şerbet ce bosey qendit
ce ẍunçey leban şîrîn řendit
wext huşyarî be giftugoten
ye xîşim û ẍezeb, ye tan û poten
erî nergis boy nezaket şîrîn
kiłaf sosenî, zułfan ’enberîn
mer herkes çun to nazk naz mibo
bê şerit û bê şon, bê mecaz mibo
er dił ce seng nît, şox sitemger
îmşew ta be řo bo peştanim ber
wer ne min taqet nedarûn îmşew
er gyan hezar bo misparûn îmşew
ba peştanit bûn, îmanim îmşew
ẍemxiwarîm biker mîhmanim îmşew
ce ’eşqit çun şem’ giryanim îmşew
boy qirçem bişnew, buryanim îmşew
er midey ce wesił min wayem îmşew
muyero ce ’erş min payem îmşew
er nedey, qîbłem, îmşew miradim
nekerî ce dest meynet azadim
erwam nemenden sewł diłpesend
erwam misparûn be gyanit sewgend
fîdat bam wesen wes azarim dew
wes be ẍemzey şox yeksan xwarim ker
çêş midey cwab feřir zêba û zuşt
bwaçan şîrîn padşahêş kuşt
îmşew ce řay lutif er bikêşîm naz
ba ce pa bost bibûn ser efraz
er lutifit nyen to ce derûnda
řuxset der pey wêm bişûn we tûnda
sehî seru qamet, kiłaf sosenî
şazadey bizurg mułk ermenî
kemend zułifit kerden zincîrim
nam wêm çun qeys berden ce wîrim
amanen îmşew çun zułf lûlit
ba bibûn peştan bałay newtûłit
bo binyew ne boy saf ’ebîrînit
binoşûn şîrey qend şîrînit
wer ne bew xuda zułf bo ’ebîrîn
misparûn be tał min gyan şîrîn