baz cwab dadin şîrîn xisru ra
From the Book:
Şîrîn û Xusrew
By:
Khana Qubadi (1704-1778)
2 minutes
301 views
şîrîn pey cewab xusrew perwêz
leb kerd be tûtî řêzey şeker řêz
wat be fîdat bam şay feřrux nejad
newey newşîrwan saḧêb ’edił û dad
mer fî’il şenî’ wêney gumřahan
xasen ke bigno ce dest şahan
kuca ḧîsaben wêney to şahê
şahê cem cenab, ḧîşmet penahê
be weswesey pûç ne ’ersey eyyam
bizurgizadeyê bikero bednam
berz bo be ałem saz bednamî
duşmin baweran pêş şadkamî
ba wicûd xo min ce şam ta şebgîr
maçim nekerden ce şa hîç teqsîr
bełê ey emre ce şayç serîḧen
emir napesend firê qebîḧen
pey çêş? netîceş her bednamyen
řû zerdeyî temam, duşmen kamyen
er řasten ke şay ferxunde exter
sewday ’eşq min midoş derdiser
ta be çendê wext bigêro aram
xatirş cem bo myawa be kam
ḧeyfen min û şa ne ’ersey eyyam
be ’ebes wêman bikermê bednam
ne ’ersey dewran ey dinyay denî
bwîm be ser jan xełq ermenî
min ce lay banû û ey peristaran
bikerî be pûł nařeway şaran
sełaḧ her êden xusrew lał poş
ḧerfim ce řay lutif bikerî ne goş
fesix bînaw bes ey îradeker
meyl be serf cam cur’ey badeker
min ce şehenşa her êden ercûm
ce wiłgey ermen neşo abřûm
neyo pêm karî çun nadrustan
bûn beser jan xełq ateş peristan
sewgendim be şerit yek řengan ’eşq
bê taqet miber şay sen’anî meşq
ḧełway şîrînim xas xoş gewaren
ẍeyr ce şa herkes binoso jaren
me’lûmen ce xełq kes lêş newerden
pey cenab şam ser be mor kerden
metłeb er ce ’îşq min azarten
sewday sefray derd bałam barten
be ḧełway wesiłim weş tam weş bo
mikerûn axir defi’ sefray to
wer ne be cextê bewr derya dił
mudde’at celam nimebo ḧasił