رسیدن شیرین به ارمن به همراهی شاپور
از کتاب:
شیرین و خوسرەو
اثر:
خانای قبادی (1704-1778)
2 دقیقه
318 مشاهده
بەی تەور کەرد ئوستای «نیزامی» تەقریر
ئینشای ئەی نامەی شۆخ دڵپەزیر
شاپوور چون جە قەسر شیرین کەرد سوار
مەرحووم بی جە وەسڵ شای فەڕڕوخ تەبار
بە جەن ڕۆ گوڵگوون توند تێز پەرواز
یاوناش بە موڵک ئەرمەن بە سەد ناز
چون ئاهووی میشکین مەست پەڕەی گوڵ
یاوا بە گوڵزار بانووی بۆ سەنبوڵ
ئەرمەن کەرد جە شەوق شۆڵەی وێش پڕ نوور
چون شەمع ڕەخشان تەجەللی کۆی توور
بانوو ئەهل و بەیت تەمام ئەهل شار
خەدەمە و غوڵام، خواجە و پەرستار
تا دیشان سوجدەی خاکپاش بەردن
جە وەسڵش بێحەد شوکرانە کەردن
جە یاقووت و لاڵ، جە گەوهەر دانە
کەردن گەنج وەقف پەی ئاتەشخانە
جە شادی شیرین شای فریشتە خوو
شایی لۆغ ژەندن تا بیست و یەک ڕۆ
هەردەم ئەو بانوو زوڵف بۆ عەنبەرین
مبۆسا پەی پەی دەست و پای شیرین
تەخت خوسرەوی، ئەسباب شاهی
هەرچی کە گەنج بی جە مەهـ تا ماهی
چون گەرم بی چەنیش شای ئەرمەن مەیلش
جە عەرسەی دنیا کەرد وە توفەیلش
نە چەم چون سورمە کێشا خاکپاش
ئەسباب شاهی گشت کەرد بە فیداش
چونکە حاڵزان بی ئەو زوڵف عەبیرین
ناوەردش وە چەم ویەردەی وەرین
پەی چێش؟ مزاناش ئەو نادیرەی دەور
یە بە کردەی عەشق پێش ئامان بەی تەور
زەرب پەنجەی عەشق زۆر بازووی دەرد
سێسەد مەیل زەنجیر مکەرۆ بە گەرد
مەنشوورەن بەی تەور دنیای موشەوەش
یانەی چەند کەس عەشق کەردن وە سەربەش
نەزەربازی و عەشق هەر دەستوور بیەن
عاشق بێچارەن، کوشتەنی نیەن
سەڵاح هەر ئێدەن نە دەور ئەییام
هەرکەسێ بە دەرد عەشق مبۆ سەرسام
فراوان بە پووچ نەدەی ستێزەش
پەی چێش؟ بەرز مبۆ فێشتەر بڵێسەش
ئاخر کە بانووی دارای دەریا کێش
نەڕای عاتیفەت بزورگانەی وێش
فەرمائەو سێسەد کەنیز جەم کەردن
چەنی چەند ئەسباب پەنەش سپەردن
سا کە دیش شیرین زوڵفان عەنبەرین
ئەو سێسەد کەنیز شەش دانگ شیرین
دەر ساعەت بەخشا پێشان چون دارا
هەر ەک یەک خەڵات زەڕ بافت خارا
دیسان نۆشان شاد مەی چەنی شیرین
شاد بین بە دیدار زوڵف بۆ عەنبەرین