رفتن شاپور حسب الامر خسرو به مدائن به نزد شیرین
از کتاب:
شیرین و خوسرەو
اثر:
خانای قبادی (1704-1778)
5 دقیقه
561 مشاهده
تووتیی خۆش تەقریر خامەی شەکەرڕێز
شەممەیێ جە شەرح شیرین و پەروێز
وێنەی «نیزامی» شوعەرای دڵپەزیر
بەی دەستوور ئاوەرد بە ڕشتەی تەحریر
جە پادشاهان عەرسەی هەفت کیشوەر
زومرەی سەلاتین سکەندەر ئەفسەر
کەسێ چون خوسرەو جەم قەدر دارا
بە عەیش و عوشرەت دنیاش نەویارا
بە ڕوو تا بە شەو، بە شەو تا بە ڕۆ
چەنی خاڵ خاسان زوڵفان عەنبەر بۆ
منۆشا شەراب ئەرغەوانی ڕەنگ
گۆش مدا بە ساز بەربەت چەنی چەنگ
شەوێ بە بێ ساز بێ بەزم و بادە
بێ ساقیی سەرمەست مەحبووب سادە
بێ شەکەر ڕازان لەبان شەکەرڕێز
نمەنیشت نە بەزم وەشبۆی بەهەشت بێز
بە نەغمەی سەنجان شۆخ خۆش ئاواز
بە دەف چیی قەوال ڕەند چۆپی باز
هەردەم مبەخشا گەنج بێ گەزاف
بە غەیر جە خەڵات دارایی و زەڕباف
شەوێ ئەو خوسرەو شای دارا شیەم
منۆشا جورعەی جام مەی چون جەم
بانووی بۆعەنبەر تەشریف بەرد ئەو شەو
چون شەمع شاهان نە خەرگەی خوسرەو
دەمێ نۆشاشان بە چەند شادی و زەوق
چەنی شەهەنشا شەراب پڕ شەوق
جە دمای شەراب تەڵخ عەنبەرین
لەب کەردن شیرین بە حوسن شیرین
شا وات بە بانوو زوڵفان عەنبەر بۆ
شنەفتم جەی وەر برازادەی تۆ
سەمەند سەرکەش هۆرگرتش بەردش
جەرگت پڕ زووخەن جە داخ دەردش
ئیمشەو وە پای تەخت ئەشرف والام
پەیک فەڕڕوخ پەی ئاوەردن وەلام
بە دەوڵەتخانەی من تەشریف بەردەن
مشکۆی بۆ میشکم موشەڕڕەف کەردەن
بە جەخس مکیانووم پەیکێ بەو وەتەن
تا باز باوەرۆش بە موڵک ئەرمەن
بانوو ئێد شنەفت نە جا کەرد ئاخێز
بۆسا پای سەریر ئەورەنگ پەروێز
واتش تا مینای سوب جە جام خۆر
ڕەخشانەن بە حوکم دەهندەی داوەر
بەرزتەر جە شاهان سەدای کۆست بۆ
زوهرە و موشتەری سەمەند بۆست بۆ
هەر نە حوکمت بۆ جە مەهـ تا ماهی
مومتاز بی بە تاج بە تەخت شاهی
چەنی ئەو کەنیز تەڵخی دیدەی دەور
بە موژدەی شیرین شاد کەردی بەی تەور
من ئارۆم زانا بە تاجت قەسەم
بە وەسڵ شیرین تاڵیم مبۆ کەم
شەهەنشا بەی زێد تەشریف ئاوەردش
بەندە خانەی وێش موشەڕڕەف کەردش
بەڵێ هەی خوسرەو سانیی کەیخوسرەو
هەرکەس پەی شیرین بکیانی بە دەو
«گوڵگوون» ئەسپێوەن نە پشت شەودێز
تەمام گێڵانەن شۆخ سوبەک خێز
چون شاباز تەور تەڕلان تێز پەڕەن
خاستەر جە شەودێز بە سم سەنگبڕەن
پەنەش مبەخشوون چەنی ڕەخت زەڕ
بەهاشەن سەد گەنج جە گەوهەر دوڕ پەڕ
خوسرەو ئێد شنەفت فەرما بە زەروور
گوڵگوون سپەردن بە دەست شاپوور
شاپوور نیشت وە بان گوڵگوون بە تاین
بە عەرز یەک ماهـ شی بە مەداین
ئاخر کە شاپوور ڕۆیێ خواراوا
بە دەروازەی قەسر شەکەر لەب یاوا
واتش بە شەخسێ زوڵف بۆ عەنبەرین
عەرز کەرد وە پای تەخت فەڕبەخش شیرین
شاپوور چینی شۆخ شیرین نەخش
مدران نە قاپیی قوسر فەرەحبەخش
نامەی سەر بە موهر خوسرەو لاڵ پۆش
«ظاهراًعربی» پێشەن ئەو پەیک پڕجۆش
ئەر مدەی ڕوخسەت جە ڕای عاتیفەت
فرێ زەروورەن بەیۆ وە خدمەت
شیرین شەم شەوق جەمین پڕ جە نوور
تەلەب کەرد دەرلاد فەرخوندە شاپوور
وەختێ کە شاپوور دانای پڕ هونەر
یاوا وە پای تەخت شیرین دڵبەر
شاد بی بە کیرباس ئاسمان سایەش
بۆسا پای سەریر سورەییا پایەش
دیش کە شازادەی شۆخ ئەرمەنی
نوختەی خاڵ وەنەوش کڵاش سۆسەنی
وێنەی دانەی دوڕ نە پای بەیزەی سەنگ
نیشتەن بێ دەماخ تەمام خاتر تەنگ
جە گڕەی سەبوون شەرارەی ئافتاو
مەیۆ و ڕووشدا عەرەق چون گوڵاو
دڵگیر بی شاپوور بە دیدەی نمناک
سوجدەش بەرد جە نەو، ڕوو ماڵا بە خاک
واتش دەک خاتوون زوانم لاڵ بۆ
سەرتاپەی تەنم وە کۆی زوخاڵ بۆ
یە چە قەسرێوەن هەر جە تۆ دوور بۆ
بە زەلزەلەی سەخت تەمام خاپوور بۆ
باب تۆ نیەن قەسرێ بەی دەستوور
قانیع کەی مبۆ سا بە دۆزەخ حوور؟
پەرێ پەیکەر سام سەمەن تورک سایە
ڕازان ڕێزەی قەند قەمەر ڕوخ مایە
شیرین چون تووتی شەکەر خای دڵبەند
بەی تەور بە ڕێزەی ڕاز ڕێزنا قەند
واتش هەی شاپوور کیمیای کۆی جەنگ
ئەر تۆ بزانی چەند کێشانم ڕەنج
شەممەیێ جە شەرح داخ و دەرد من
ڕەمزێ جە ئاداب کۆی نەبەرد من
تا بە قەرنێ ساڵ بەڵکم زیاتر
نمەیۆ نە زەبت خامەی بۆعەنبەر
هەر ئەو ڕۆ، شاپوور، بە دەوان دەو
یاوام بە مشکۆی دەربەستەی خوسرەو
جەمعێ پەرستار شووم بێ غەیرەت
دوور جە حەیا و شەرم بێ عەرز و سیرەت
جە ڕای بەدتەورێ کارێ کەردن پێم
واستم بە ئاوات سەد جار مەرگ وێم
بە دیدەی پڕ ئەسر خاتر پەرێشان
جە لا عیلاجی گورێزام لێشان
ئیسە یا جەی قەسر پڕ جە خار و سەنگ
مەندەنان خەریک من بە خاتر تەنگ
ئاخر کە شاپوور نادیرەی ئەییام
واتش سۆسەن بۆی ساحێب سایە و فام
خوسرەو نە ئەرمەن ئینتیزارتەن
بانووی دڵسۆزت تەڵەبکارتەن
هۆرێز تا بشیم بە دەوان دەو
بە پای تەخت خاس خەجستەی خوسرەو
بێ شۆنیی یاران شەرت و بەینەت کەم
جە ڕای بزورگی هیچ ماوەر وە چەم
سوار بی شیرین بە حەرف شاپوور
ڕووش کەرد نە ئەرمەن وینەی شەمع نوور