riftin şapur ḧisb alamir xisru bih mida’in bih nizd şîrîn
Li pirtûka:
Şîrîn û Xusrew
Berhema:
Xanayê Qubadî (1704-1778)
5 Xulek
598 Dîtin
tûtîy xoş teqrîr xamey şekerřêz
şemmeyê ce şerḧ şîrîn û perwêz
wêney «nîzamî» şu’eray diłpezîr
bey destûr awerd be řiştey teḧrîr
ce padşahan ’ersey hefit kîşwer
zumrey selatîn sikender efser
kesê çun xusrew cem qedir dara
be ’eyş û ’uşret dinyaş newyara
be řû ta be şew, be şew ta be řo
çenî xał xasan zułfan ’enber bo
minoşa şerab erẍewanî řeng
goş mida be saz berbet çenî çeng
şewê be bê saz bê bezim û bade
bê saqîy sermest meḧbûb sade
bê şeker řazan leban şekerřêz
nimenîşt ne bezim weşboy beheşt bêz
be neẍmey sencan şox xoş awaz
be def çîy qewal řend çopî baz
herdem mibexşa genc bê gezaf
be ẍeyr ce xełat darayî û zeřbaf
şewê ew xusrew şay dara şyem
minoşa cur’ey cam mey çun cem
banûy bo’enber teşrîf berd ew şew
çun şem’ şahan ne xergey xusrew
demê noşaşan be çend şadî û zewq
çenî şehenşa şerab piř şewq
ce dimay şerab tełx ’enberîn
leb kerdin şîrîn be ḧusin şîrîn
şa wat be banû zułfan ’enber bo
şineftim cey wer birazadey to
semend serkeş horgirtiş berdiş
cergit piř zûxen ce dax derdiş
îmşew we pay text eşirf walam
peyk feřřux pey awerdin welam
be dewłetxaney min teşrîf berden
mişkoy bo mîşkim muşeřřef kerden
be cexis mikyanûm peykê bew weten
ta baz baweroş be mułk ermen
banû êd şineft ne ca kerd axêz
bosa pay serîr ewreng perwêz
watiş ta mînay sub ce cam xor
řexşanen be ḧukim dehnidey dawer
berizter ce şahan seday kost bo
zuhre û muşterî semend bost bo
her ne ḧukimit bo ce meh ta mahî
mumtaz bî be tac be text şahî
çenî ew kenîz tełxî dîdey dewr
be mujdey şîrîn şad kerdî bey tewr
min arom zana be tacit qesem
be wesił şîrîn tałîm mibo kem
şehenşa bey zêd teşrîf awerdiş
bende xaney wêş muşeřřef kerdiş
bełê hey xusrew sanîy keyxusrew
herkes pey şîrîn bikyanî be dew
«gułgûn» espêwen ne pişt şewdêz
temam gêłanen şox subek xêz
çun şabaz tewr teřlan têz peřen
xaster ce şewdêz be sim sengibřen
peneş mibexşûn çenî řext zeř
behaşen sed genc ce gewher duř peř
xusrew êd şineft ferma be zerûr
gułgûn siperdin be dest şapûr
şapûr nîşt we ban gułgûn be tayn
be ’erz yek mah şî be medayn
axir ke şapûr řoyê xwarawa
be derwazey qesir şeker leb yawa
watiş be şexsê zułf bo ’enberîn
’erz kerd we pay text feřbexiş şîrîn
şapûr çînî şox şîrîn nexiş
midran ne qapîy qusir fereḧbexiş
namey ser be muhir xusrew lał poş
«zahraًErebî» pêşen ew peyk piřcoş
er midey řuxset ce řay ’atîfet
firê zerûren beyo we xidmet
şîrîn şem şewq cemîn piř ce nûr
teleb kerd derlad ferxunde şapûr
wextê ke şapûr danay piř huner
yawa we pay text şîrîn diłber
şad bî be kîrbas asman sayeş
bosa pay serîr sureyya payeş
dîş ke şazadey şox ermenî
nuxtey xał wenewş kiłaş sosenî
wêney daney duř ne pay beyzey seng
nîşten bê demax temam xatir teng
ce giřey sebûn şerarey aftaw
meyo û řûşda ’ereq çun guław
diłgîr bî şapûr be dîdey nimnak
sucdeş berd ce new, řû mała be xak
watiş dek xatûn zwanim lał bo
sertapey tenim we koy zuxał bo
ye çe qesrêwen her ce to dûr bo
be zelzeley sext temam xapûr bo
bab to nyen qesrê bey destûr
qanî’ key mibo sa be dozex ḧûr?
perê peyker sam semen turk saye
řazan řêzey qend qemer řux maye
şîrîn çun tûtî şeker xay diłbend
bey tewr be řêzey řaz řêzna qend
watiş hey şapûr kîmyay koy ceng
er to bizanî çend kêşanim řenc
şemmeyê ce şerḧ dax û derd min
řemzê ce adab koy neberd min
ta be qernê sał bełkim zyatir
nimeyo ne zebit xamey bo’enber
her ew řo, şapûr, be dewan dew
yawam be mişkoy derbestey xusrew
cem’ê peristar şûm bê ẍeyret
dûr ce ḧeya û şerim bê ’erz û sîret
ce řay bedtewrê karê kerdin pêm
wastim be awat sed car merg wêm
be dîdey piř esir xatir perêşan
ce la ’îlacî gurêzam lêşan
îse ya cey qesir piř ce xar û seng
mendenan xerîk min be xatir teng
axir ke şapûr nadîrey eyyam
watiş sosen boy saḧêb saye û fam
xusrew ne ermen întîzarten
banûy diłsozit tełebkarten
horêz ta bişîm be dewan dew
be pay text xas xecsitey xusrew
bê şonîy yaran şerit û beynet kem
ce řay bizurgî hîç mawer we çem
swar bî şîrîn be ḧerf şapûr
řûş kerd ne ermen wîney şem’ nûr