ḧikayt kirdin şapur dir nizd xisru az ḧalat şîrîn
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
360 Dîtin
muẍ beçey ey bezim cur’ey badenoş
bey tewr noşa cam ce sehbay sercoş
şewê řewşenter ce cam cemşîd
midrewşa çun şem bercîs û nahîd
nîştebê xusrew ce xergay şahî
nimanaş we çem ce meh ta mahî
çend kes ce nedîm suxen sencîde
dana bizurgan, kar pesendîde
gişt temam xoş lefiz, gişt şîrîn xîtab
gişt saḧêbî zîc cefir û usturlab
pey tefrîḧ tebi’ humayûn ew
çenî çend begler ḧazir bîn ew şew
ce serdîy yexbend tof piř xeter
çabuk feřraşan ałay piř huner
be nimed dewran xergey şa temam
poşabên pey defi’ serdî sub ta şam
seḧinş ce bixûr ’ebîr û ’enber
ce řayḧey ’ûd ce mîşk ezfer
bêzarbê bê laf gezaf be naqî
řyaz řewzey beheşt baqî
ce zeřřîn mengeł pey pey be dewan
mixêza ne řûy guł şax řêḧan
pey defi’ serdî ne řûy xaksiter
midrewşa çun lał bedexşî exger
zuxał ayr syay ermenî
ga mibî xûnî, gahê sosenî
şapûr wat hey şa zîlil îlahî
zêbnidey ewreng feřbexiş şahî
ta firozanen ne çerx exzer
qurs usturlab xurşîd xawer
tenaf xeymey xusrewît daym
be ewtad feził êzed bo qaym
ḧedîs bendey qedîmî sałan
dirazen çun zułf nazk newhałan
axir ḧîkayet sûret keştîy wêş
maceray şîrîn sewł bê endêş
be lefiz fesîḧ seraser temam
’erz kerd we xidmet şay gerdûn meqam
sa ke êd şineft şay derûn piř derd
wataş ey neqqaş danay cewan merd
axir newnemam newxêz sawa
kam meqam ce şewq nûrş bî awa
wat ew newnemam newřsîdey !no
ew şox şeş dang kiłaf ’enber bo
bew řêzey řazan şeker řêzewe
řahîm kerd derlad be şewdêzewe
bełê min ce řenc řagey sext dûr
neyawam bew şox şołey şem destûr
înşałła ew yar ahûy xuten bêz
yawan be mişkoy bo mîşk perwêz
xusrew cey teqdîr merbût şapûr
guł guł şikawa bêḧed bî mesrûr
ce dimay teḧsîn te’zîm bê şo
fermaş daney lał gewher kerdin ko
ew şew be ’îzzet ta beşebeq zerd
şapûr çînî gewher fişan kerd
şa hem pey şapûr xîredmend pêş
temqam kerd beyan serguzeşt wêş
me’lûm bî lêşan ew şay şeker řaz
yawan be eqsay meda’în be naz
xatîmey kelam be êd bî munceř
hem ce no şapûr peřende bê peř
şîrîn şeş dang çun ahûy xuten
bawero dîsan be mułk ermen