نشستن خسرو بر تخت شاهی
از کتاب:
شیرین و خوسرەو
اثر:
خانای قبادی (1704-1778)
2 دقیقه
410 مشاهده
تووتیی شەکەر ڕاز خامەی خۆش تەقدیر
بەی تەور ئینشا کەرد شیرین تەرز و تیر
خوسرەو چون بەرشی جە مەعرەکەی سەخت
وێنەی کەیخوسرەو مومتاز بی بە بەخت
سیماش وێنەی شەمع تەجەللای کۆی توور
مدرەوشا بە لوتف خوداوەند جە نوور
چون بە حوکم زات «لا احصىٰعربی» سیفات
جەناب ئەقدەس «جاعِل الظُلَماتعربی»
ئەو وێنەی عاشق دەروون سفتەی داخ
چون زوڵف پەشێو بی، پەرێشان دەماخ
شەمەن زار ڕوو چون وەنەوشەی شەو
سیا بی چون زوڵف شیرین خەسرەو
پەرویز بەی تاعەت یەکتای یەگانە
کەمەر بەست و شی بە تاعەت خانە
دەمێ تاعەت کەرد بە ئاهـ سەردەوە
ئاخر جە ناکاو خاوەش بەردەوە
ناگاهـ نەوشیروان عەداڵەت دەستوور
ئاما نە خاوەش وێنەی شەمع نوور
واتش هەی فەرزەند فرۆزەندە بەخت
بەرارەندەی تاج، پادشاهی تەخت
بێ دەماخ مەبەر فەرخوندەن بەختت
پەی ئەسپ و غوڵام، پەی زین ڕەختت
هەرچەند جە عەرسەی دنیای پڕ مەلال
ترشیت چەشت ججە پەی قۆرەی ترش و تاڵ
مدۆ تەلافیت بێ شک خوداوەند
شەخسێ شەکەر ڕاز شیرینتەر جە قەند
چون بە ئەمر شاهـ ئەسپت پەی کەردن
وە جای بادەی ناب خەفەت پێت وەردن
نەشنەفت کەس جە تۆ یەک حەرف سەردێ
نەنیشتت بە خاتر شەریفت گەردێ
شاد مەبی وەڵڵا تۆ وە شەبدێزێ
بە ڕەفتار نەسیم سوب سەحەر خێزێ
بە دیهقان هەرچەند هەم داشان ڕەختت
نیشانەی سەعدەن پەی تاڵەی بەختت
ڕاستەن کە سفتەن دەروونت جە داخ
ناخوون چنگت مەڕدن بە چۆماغ
خاترت جەم بۆ «باربود» نامێ
سازەندەیی شۆخ، شیرین کەلامێ
مگنۆ بە دەستت نە ڕووی سەرزەمین
نە قەیسەر دارۆ، نە خاقان چین
شەهزادە جە خواب شیرین بی بیدار
بەردش سوجدەی شوکر خوداوەند سەد جار
تا چەندێ خوسرەو ساڕێش بی داخەش
جە شادی ئەو خاو بەرز دەماخەش
هەرچەند شەو چەنێ دانای سوخەن سەنج
سەڕافان دەور کیمیای کۆی گەنج
بە تەمای ئەو خاو خاستەر جە دارا
تا وە سوبحدەم وەشی مویارا