چەکی یەکێتی
از کتاب:
پاشمەرگەی قانع
اثر:
قانع (1898-1965)
2 دقیقه
628 مشاهده
چەن خۆشە ئەو زەمانە لە کوێستان و خوار و ژوور
فەرقی نییە لە بەینی برا و خوشک و خاڵ و پوور
چەن خۆشە ئەو نیزامە، سەراسەر هەموو وڵات
یەک ڕەنگ و یەک مەبەست و یەک ئاوات و پڕ لە نوور
چەن خۆشە ئەو وڵاتە کە جووتیار و ڕەنجبەران
تیایا ئەبن بە خاوەنی حوکم و سوپای جەسوور
چەن خۆشە ئەو زەمانە کە کوێستان و گەرمیان
یەکسەر ئەبێتە جونبشی دەریای هێزی سوور
ئەی لاوی کورد! بە بیر و باوەڕی کوردانە یەک گرن
بورکانی ئاگرین بن، لە ڕووی دوژمنی غوروور
بینێنە گۆڕی تارەوە ڕسوومی عەشیرەتی
فەرقی مەخەن لە بەینی غەنیدا هەتا مزوور
سەنعەت بکەن بە هێز و گریکی وڵاتەکەت
ڕازاوە کەن شەقام و تەلار و قەسر و قوسوور
لە تۆی دەروونی خاکەوە دەربێنە ڕۆنی ڕەش
خڵتەی دەمارەکانی بپاڵێون بۆ بلوور
شۆڕش بکەن لە ڕووی نەزانین و جەهلدا
تۆوی نیفاق و ئەجنەبی دەرکەن هەتا سنوور
هاوکاری کەن بە مەرج و بناغەی ژیانی گەل
تەوحیدی فکرە، شەرتی ئەساسە، نزیک و دوور
شادم بە ئەو زەمانە کە بە داشدیاری ڕەنجبەران
وەرزێر ئەنێتە گەردنی ئاغا گوریسی سوور