ئیرۆ ژ دەربا خەنجەرێ
لە کتێبی:
دیوانی مەلای جزیری
بەرهەمی:
مەلای جزیری (1570-1640)
2 خولەک
1543 بینین
ئیرۆ ژ دەربا خەنجەرێ، لازم ب ئێشانی مەلا
تەشبیهێ زولفا دلبەرێ، زانم پەریشانی مەلا
زانم پەریشانی ژ دل، بێحەد ب ئێشانی ژ دل
تەشبیهێ بریانی ژ دل، بیللاهـ نە ئنسانی مەلا
بیللاهـ چ تەبعەت ئادەمی، یەکسەر دبێم یەک عالەمی
دەریایێ قاف و قولزومی، یان چەرخێ گەردانی مەلا
یا رەب چ وێ محنەتکەشی، سەر تا قەدەم تێک ئاتەشی
مەجرووحێ قەوسێ تووزرەشی، لەو دل ب پەیکانی مەلا
زانم ژ عشقێ دۆژەهی، بەحرەک ژ نارێ ئاسهی
ئیرۆ ل ماهێ خەرگەهی، تەشبیهێ سەیوانی مەلا
ئەڤ سینەیا وەک نای و نەی، پوڕ لێ کشاندن داغ و کەی
هێ دل ب نائەهلان ددەی، یا رەب چ نادانی مەلا
دوڕدانەیا دێم گەوهەرە، ئایینەیا ئەسکەندەرە
بێ موروەتێ دل کر کەرە، مەجرووحێ خالانی مەلا
بێ موروەتێ دل هەررشاند، تەشبیهێ شیشێ لێ کشاند
کەر کر جەگەر خوێ لێ ڕەشاند، ئاتەش ل سەر دانی مەلا
نارێ ژ ڕەنگێ دۆژەهێ، حوسن و جەمالا وێ مەهێ
مە د پەردەیا ڤێ خەرگەهێ، خەف کر چ عوممانی مەلا
ئیرۆ ل عومرێ خوەی تەلەف، بێ شاهد و جاما سەدەف
بێ چەنگ و ساز و نای و دەف، زانم پەشیمانی مەلا
زانم تە کۆهێ توورە دل، لەو هەر ب نار و نوورە دل
شەهکاسەیا فەرفوورە دل، لەو مەست و سەکرانی مەلا
هەر سینە تابێ ناتەمام، ناپوختە خام بێ مهر و جام
غەرقێن د خوینا دل مەدام، لەعلا بەدەخشانی مەلا
پوڕ لەعل و دور تە ژ کلکێ عشق، ئانینە نەزما سلکێ عشق
دەر بەرر و بەحرێ مولکێ عشق، مەعلوومە خاقانی مەلا
بێ حەد ل قەلبێ شوبهێ نەی، جەورا تە دانین داغ و کەی
لەو بێ حەمەل خوەش نینە مەی، ئەمما ب شیرانی مەلا
مننەت ژ تالع هەر ژ بەخت، ئاسف ب تەخت و بەخت و ڕەخت
بەلقیس ئەوی ئانی ب وەخت، ئیرۆ سولەیمانی مەلا
ئەو هەردو لەعل و هەردو وەشم، گەهـ گەهـ ب ناز و گەهـ ب خەشم
ئەو بەژن و بالا هاتە چەشم، مە د سەیرێ ڕووحانی مەلا