لە پاسێکدا

هێشتا پاسە قژ زەردەکە هەر وەستاوە
یەکە یەکە سەرئەکەون
هەر کورسییەکەی تەنیشتی من
تاقە کورسییە قژ ڕەشەکەی تەنیشتی من
هەتا ئیستە
هەر ئەو چۆڵە.
هێشتا پاسە قژ زەردەکە هەر وەستاوە
سەرئەکەون و ڕوو ناکەنە
تاقە کورسییە قژ ڕەشەکەی تەنیشتی من
وەستاون و نایانەوێ بچنە لای ئەو
بۆنێکم کرد
بۆنی ناخۆشی لێ نایەت
سەرخۆش نییە و
بەردەوامیش بزەیەکی لەسەر لێوە!
هێشتا پاسە قژ زەردەکە هەر وەستاوە
تاکوتەرا سەرئەکەون
ئەوا ئیستا تاقە کورسییە
قژ ڕەشەکەی تەنیشتی من
هەروەکوو خۆم
قژ ڕەشێکی لەسەر دانیشت
پاسەکەیش ڕۆیشت!