هەراسی
لە کتێبی:
چەپکێ گوڵ و خونچە
بەرهەمی:
عەلی عارف ئاغا (1910-1996)
1 خولەک
264 بینین
ئەوانەی وا لە دڵداری هەراسن
لەناو دنیای ژیاندا گێژ و کاسن
کەسانی دوور لە یارانی جوانن
هەژار و پەست و کەمهۆش و کەساسن
نیگاران نەوبەهاران چەشنی جاران
خرۆش و زەمزەمەی شادی ئەناسن
دڵی من بۆ غەمی عەشقی نیگاران
بەتینە زۆر بەهێزە جۆری ئاسن
نەفامان ناحەزانی گێرەشێوێن
خەریکی هات و بردی دەنگ و باسن
بەڵام یاران لە چاکیی ئێمە ڕازین
دەبا بەدخوو بە داخی دڵ بتاسن