خۆت بە گەورە مەگرە
لە کتێبی:
باخچەی کوردستان
بەرهەمی:
قانع (1898-1965)
1 خولەک
421 بینین
کوێخایەک نانی بۆ ڕەنجبەرێ برد
زۆر زۆر بە سووکی تەماشای ئەکرد
ڕەنجبەر پێی زانی وتی ئاغای خۆم
تۆ وا ئەزانی ئافەریدەی تۆم؟
من پارەم ئەوێ، تۆ زۆرت ئەوێ
فیزی چی ئەکەی هەی کۆستت کەوێ؟
تۆ لەگەڵ مندا سەرف ئەکەی پارە
من ڕۆح سەرف ئەکەم سوبح و ئێوارە
ئەگەر وەکوو من بێڵ ئەوەشێنی
ئەوسا ئەزانی چۆن دائەمێنی
من نان و بەرگی تۆ پەیا ئەکەم
عومری عەزیزی خۆم بە با ئەدەم
من بەخۆڕایی قەت ناخۆم نانت
تەنها نیو سەعات نابمە میوانت
من زۆر و تۆ زەڕ ئەدەین بە یەکتر
هەردوو مەمنوون بین یەک لە یەک چاتر
گەوهەری عەرەق ئەڕژێنمە زەوی
بەتاڵ ناخەوم مل بکەم قەوی
یەکێ نەبەخشێ بە یەکێ بەرات
هیچ حەقی نییە فیزی لەسەر کات
ئەگەر هات کردی ئەوە کەرییە
لە کەری بەدتر دەردی سەرییە