گلەیی قانع لە ڕۆزگار
لە کتێبی:
چوارباخی پێنجوێن
بەرهەمی:
قانع (1898-1965)
2 خولەک
972 بینین
دیسان دێمە سەر نووسینی ئەشعار
دەردی دڵی خۆم چاک ئەکەم ئیزهار
قەرارم وا بوو نەیەمە گوفتار
بەڵام نایەڵێت چەرخی چەپ کردار
ئەبێ بنووسم یەکێ لە هەزار
تەماشا ئەکەم چەرخەکەی گەردوون
کەر ئەکا بە شا، شا ئەخاتە توون
چەندە نەوجەوان ئەکا سەرنگوون
لەیلێ بۆ ئەغیار شیوەن بۆ مەجنوون
بەش وەها ئەبێ کۆنەی بەد کردار؟
سەرداری سەر تەخت ئەکەی بە بێ سەر
بێ سەر ئەبەیتە ڕیزی تاجوەر
خوێنی چەن مەزڵووم ئەدەی بە هەدەر
بەرگ ئەدەی بە مەڕ، کێر ئەدەی بە کەر
ئافەرینت کەن دەوری ڕۆزگار
من هەر زوو زانیم کە دوون پەرەستی
تۆیش بەوێنەی من بێ بادە مەستی
دایم خزمەتکار ڕەزیل و پەستی
شەو و ڕۆژ خەریک کەڵەک و بەستی
بەڵکوو فەقیرێ بخەیتە ژێر بار
چەرخە داوەشێی بێ خان و مان بی
لە من خرابتر تۆ سەرگەردان بی
گیرۆدەی دەردێ بەبێ دەرمان بی
نان خۆری درگای خانەقایان بی
ببی بە عیبرەت لە بازاڕ و شار
چەرخە دەک پیر بی وا منت پیر کرد
بە کەس ناوێری منت ئەسیر کرد؟
هەسێرەی منت لە گۆما گیر کرد
منت کرد بە شێت ئەحمەقت ژیر کرد
وەعدەی من و تۆ دیوانی غەففار
گاجووت ئەکەیتە سەردەسەی ئەعیان
ئەدەی بە ڕێوی نەعرەتەی شێران
یابوو ئەبەیتە ڕیزی سەرداران
تاکەی چەپگەردی؟ ماڵت بێ وێران
ئەکەی بە پێشەنگ دێڵە کەمتیار