هەرچی خاوەن پارەیە
لە کتێبی:
ئاشنایی و ڕۆشنایی
بەرهەمی:
عەلی عارف ئاغا (1910-1996)
1 خولەک
220 بینین
وامەزانن دەوڵەمەندە هەرچی خاوەن پارەیە
زۆر هەیە پارەی بە لێشاوە بەڵام بێ چارەیە
ماڵی خۆی ناچێ بە دەمیا ڕۆح و چاوی برسییە
ئەو لە کۆمەڵدا گەلێ بێ نەرخە یا پەتیارەیە
پارە بۆ خۆشیی ژیان سەرفی نەکەی کەڵکی چییە؟
دەستی قووچا هەرکەسێ، بێ حوورمەت و بێ کارەیە
پارە گەر سەرفی نەکەی فەرقی لەگەڵ خۆڵا چییە؟
زۆری وا هەن دەسنیشانی خەڵکەکەی ئەم شارەیە
ئەو شتەی لەم کارە وا داخی دەروونم لا ئەبا
دەنگی نای و تار و عوود و عارەقی دووبارەیە