ئیمڕۆ دانیشتم لە پەنای دیوار
بەختی خەواڵۆم
لە کتێبی:
دیوانی لوتفی
بەرهەمی:
لوتفی (1905-1989)
2 خولەک
505 بینین
ئیمڕۆ دانیشتم لە پەنای دیوار
عاجز و داماو، بێ کەس و غەمبار
دونیا زۆر ساردە بەفرە و یەخبەنان
شەختە و زقوومی ئەرز و ئاسمان
دڵی من گەرمە وەک ئاتەشخانە
قرچەی دەروونم ئەڵێی بوریانە
هەناسەی سەردم دووکەڵی ئاسمان
وێنەی تانجەڕۆ ئاو دێ لە چاوان
دەردی دونیایی دەوری لێ داوم
نەماوە هێز و توانا و تاوم
گرفتاری دەرد ڕووی ڕۆژگارم
شەوو ڕۆژ هەر شین گریانە کارم
قەت نەبوو ڕۆژێ بەبێ خەفەت بم
لە کەیف و شادی لە ئیسراحەت بم
ەر لە خەو دایە بەختی خەواڵۆم
قەت پێش نەکەوتم لە ڕەفێقی خۆم
هەر ڕۆژ بۆ لایێ سەر خۆم هەڵ ئەگرم
نازانم خوایە بۆ چی نامرم
لەتاو ناچاری و دەس کورتی و نەبوون
جەرگ و هەناوم گشت بووە بە خوون
دەخیل بە پیاوی ڕەزیل و ئاڵچاخ
دڵی زامدارم پڕ بووە لە داخ
خسووس دەوڵەمەند لە ئەم زەمانە
دائیم لە حیرسا دڵ پەرێشانە
ناوچەوان دائیم ترش و تاڵ و سوێر
پیش ئەخواتەوە وەک مەیموونی نێر
هەمیشە غەمگینی بە ڕۆژ و بە شەو
نە نانی نانە نە خواردن نە خەو
گەر بە دەس ئەو بێ هەژار نامێنێ
عەرد و بەرد و شاخ گشتی ئەسێنێ
ڕەبی با بەس بێ ئیحتیاجی نامەرد
تابەکەی پەی پەی هەناسانی سەرد
تا کەی بە ڕووتی و چڵکن لە ناو عام
تا بە کەی لۆمە و تەعنەی خاس و عام
ئەمجا بە ڕەحمەت خالیقی بێ باک
بە تەقدیری خۆت تاک و تەنیای تاک
بەسە هەتا کەی جەوری دونیای دوون
بەسە مەینەت و هەژاری و نەبوون
لوقمەیی حەڵاڵ زۆر بە ئیسراحەت
لوتفیناسناوی ئەدەبی داوا کە لە دەرگەی ڕەحمەت