بۆ حەکیمی تێگەیشتوو ئینتیزارم ڕۆژ و شەو
لە کتێبی:
دیوانی سابیری
بەرهەمی:
سابیری (1881-1944)
1 خولەک
965 بینین
بۆ حەکیمی تێگەیشتوو ئینتیزارم ڕۆژ و شەو
شیوەن و گریانە دائیم، ئیش و کارم ڕۆژ و شەو
ڕۆژ خەیاڵی ڕوومەتی، شەو یادی زولفی نایەڵن
خواردن و خەوتن نییە سەبر و قەرارم ڕۆژ و شەو
من لە خۆشی وەعدەکەی یەک لەحزە ئارامم نییە
ئینتیزار و کاتیبی لەیل و نەهارم ڕۆژ و شەو
خۆ لە شمشێری برۆ و لێوگەستنت باکم نییە
خۆت ئەزانی بێ شعوور و بێ ویقارم ڕۆژ و شەو
خوێنی دڵ داوێنی چاوی گرتووم مەنعم مەکەن
وا بە تووندی لێیئەدا نەبز و دەمارم ڕۆژ و شەو
گەر تەماشا کەی لە ئاوێنە دیارە عیللەتم
خۆ بە بێ حیکمەت نییە بەحر کەنارم ڕۆژ و شەو
ئەی پەریڕوو تۆ بە شمشێری برۆ ترساندمت
هاتەوە سوێ کۆنەزامی ساڵی پارم ڕۆژ و شەو
باوەڕت بێ سوورەتی تۆ وا لە دڵما نەخشی بەست
زیکر و فیکری حوسن و خاڵە کەسب و کارم ڕۆژ و شەو
یادی تۆ دائیم برینی سابیریناسناوی ئەدەبی دێنێتە سوێ
یەک هەوایە زامەکەی ئەمساڵ و پارم ڕۆژ و شەو