کۆڕنیکا
تێ ئەکۆشین بۆ ڕۆژێک کە ئادەمیزاد؛ ڕەش و سوور و سپی و زەرد یەکدڵ لە سێبەری ئاشتییا بژین...
لە کتێبی:
ئاگر و ژیلە
بەرهەمی:
کامەران موکری (1929-1986)
1 خولەک
1 بینین
لەناو کۆڕنیکای وێرانا
لەژێر شیناییی ئاسمانا
ڕیبوارێک ملی ڕێ ئەگری
ورد ورد ڕێی ژیان ئەبڕێ
بەرخۆلەیەک لە باوەشیا
کۆترێک لە دڵی گەشیا
گۆرانییەک ئەڵێ ئازاد
بۆ گیانی گشت ئادەمیزاد
نەغمەی یاخیبوونێک خاوێن
گۆرانییەک بۆ هەموو شوێن
سروودێکی لێ ئەبیستی
کە ئەڵێ: «ئەی خۆشەویستی»
سوپاس سوپاسی بێ پایان
سوپاس «نا» بۆ زۆردارەکان
سروودێک ئەڵێ پڕ ئاوات
بۆ «دنیا» نەک هەر یەک وڵات
زەردەواڵەی ئازار و قین
ئەفڕن بەرەو ئاسمانی شین
هێلانەکەی دڵ جێدێڵن
یەک لە دوای یەک هەڵئەفڕن
تەنیا «تۆوی» گۆرانییەکەی
کە پڕە لە خۆشی و ئۆخەی
ئەمێنێ دوای گشت کارەسات
دوای هەر شتێک بەسەری هات
هەنگوین ئەکاتە ناو دڵان
ئەیکاتە ناو دەمی ژیان
کۆڕنیکا ئەی کۆڕنیکا گیان
هەر بێتاوانی بێ گومان
زاڵ ئەبی بەسەر تاوانا
تاکوو ئەبەد لە ژیانا