قافیەش گران بوو!!
لە کتێبی:
دیوانی پیرەمێرد
بەرهەمی:
پیرەمێرد (1867-1950)
1 خولەک
482 بینین
سەیرانکەران بەهاران
کە دەچنە بەر بناران
بە چۆپی پۆیلەداران
عومر دەگێڕنە دواوە
***
تیپی کچان لەو دەشتە
وێنەی حۆری بەهەشتە
پێی پیاو ئەبەن لە خشتە
سەر لە ڕێبوار شێواوە
***
ئەو ئەرخەوانە جوانە
کە لە گردی سەیوانە
بە ڕیزە ئەو کچانە
وەک قومری دەوریان داوە
***
ئەو کارێزەی لەو سەرە
کە جێ ڕاوگەی دولبەرە
ئەو ئاوەی وەک کەوسەرە
کلێکە، نووری چاوە
***
بۆ ئەم خەڵکە وەک دڵسۆز
گڕم تێ بەربووە بە سۆز
ناوم نا ئاگری نەورۆز
ئەم ئیرسە بۆ من ماوە
***
بەهەشتی جاودانی
هیچ کەس نەیدی و نەیزانی
بەهەشتی سلێمانی
ئاشکرا لە پێش چاوە
***
کردیە ڕەهێڵە و باران
دوایی هەڵیپڕووکان
هەم پێکەنین، هەم گریان
هەر لە ئاسمان ڕوویداوە
***
ئەم کوردییەی ڕەوانە
کە ئاسان و گرانە
پێغەمبەری زبانە
بۆیە وا کەوتە دواوە